نقدم ليكم سري في بنة اللحم او الدجاج ديال الفران لي كلشي كيشكرني عليه

سلام عليكم حبيباتي
الصراحة الكل الي كياكل عندي سواء الدجاج او اللحم في الفران كيقول ان بنتو دايزها الكلام
والسر عرفتو من احد المواقع المصرية الي تبارك الله حتى هما الاخوات المصريات عندهم مايقولو في فنون الطبخ والشؤون المنزلية

من بعد ماشرملتي اللحم ديالك بليقامة اللي موالفة كتديري انا كندير مروزية اللحم التوم محكوك بصيلة مشلظة رقيقة الابزار شوية الحرور الى كاين خرقوم عرق خرقوم عادي غير شوية شوية القرفة شوية سكنجبير المهم التلقيمة على حسب كل اخت او كتحب وانا كنظيف ليه حبات من الهيل حبات من القرنفل وورقات ديال سيدنا موسي
سواء رقدتيه وخليتيه شوية او بغيتي تدخليه للفران وقتها
قبل ماتدخليه للفران حطيه فوق البوطة بالطاوة ديالو او المول ديال الي غادي يدخل فيه للفران نقصي عليه العافية مزيان وقلبيه مزيان خليه يشرب مزيان ليقامة ديالو كل شوية تقلبي من بعد زيدي الما الي غادي يكفيك غالبا انا كندير غير كاس ديال العنبة وخليه فوق البوطة مع التحريك حتى يغلى داك الما
من بعد غطيه بورق الالومنيوم ودخليه للفران شعلي عليه من لفوق ولتحت حتى يطيب مزيان وعري عليه يتحمر شوية من لفوق

نتمنى نكون افدتكم واخا غير شوية

نسيت نقول انو ممكن الى بغيتي تجبيب فيه البنة ديال الشوا تشعلي واحد الفاخرة وتحطيها في وسط اللحم تكوني متلا حطيتيها على شي طريف ديال الورق ونقطي عليها نقيطات ديال الزيت غادي تشوفيها طلقات الدخان في ديك اللحظة رجعي غطيه خليه يشرب ريحة دخان الفاخر




قد يعجبك ايضا
اترك تعليقا