الكوكلي معسل مع الأناناس و الروز مفور … وتقديم غاية في الأناقة من عند لالة حبيبة

طريقة تحضير الكوكلي معسل

في الطنجرة كنشلضوا البصلة و التومة و شوية اللب ديال الحامض مصير و العطرية ابزار سكين جبير قرفة عواد و زعفران شعرة وواحد طوبة ديال كنور الدجاج و الملح غير شويةو معلقة صغيرة السمن و شوية الزيت العادية و كنخلطوا الكل و كنشرملوا بهم الكوكليات من جميع الجوانب

منين كنشرملوا الكوكليات كنجمعوا الرجيلات ديالهم و نمرقوا بالماء على حساب فاش يطيب الكوكلي اي الماء ما نكتروهش يكون على حد الكوكلي تم كنظيفوا القزبر و المعدنوس مربطين و عويدات ديال القرفة و نغطيوا الطنجرة ديالنا مرة مرة نطلوا على الطنجرة و نقلبوا الكوكلي باش يطيب من كل الجهات

منين يطيب الكوكلي نحيدوه من الطنجرة و نخليوا ديك المرقة تشحر حتى توقف مع التحريك المستمر تم كنظيفوا للمرقة واحد نصف كاس عسل من الاحسن تكون حرة و نردوا الكوكليات حتى يتعسلوا في ديك المرقة المعسلة صافي نطفيوا عليهمو ندخلهم للفران ياخذو اللون

ونقدمه مع السفة أو الروز أو بوحدو و نزين باش بغينا (الزبيب و أناناس أو شرائح البرتقال ,مشمش… )