عراضة اشمن عراضة…متولة و راقية من الاخت أم أسامة و ايمان

أنيقاتي الغاليات مرحبا بيكم عندي

هاد العراضة عملتها الأسبوع لي فات لصديقاتي كنتمنى تستافدو منها وتعطيكم أفكار جديدة إن شاء لله

بطبيعة الحال وكيف قلت فالموضوع السابق ديال العراضة التحضير المسبق كيلعب دور كبير فالتنضيم

لكن أنا هاد المرة وحيت جات مع السفر والعطلة كان عندي يوماين باش نوجد كلشي والحمد لله ربي ما خيبنيش وداز كلشي بخير

وجدت مويعناتي لي غادي نحتاج مصورتهمش حيت سبق نزلتهم فالموضوع السابق

فاليل وجدت الحشوة ديال بسطيلة د الحوت وشرملت طريفات د الحوت غادي نوق بيهم بسطيلة وعملت كلشي فالثلاجة

حشوة البسطيلة خليتها بلا شعرية الصينية حتى قربت نلويها عاد طيبتها لدقائق وزدتها على الحشوة

صورت المراحل إن شاء لله نزلها في موضوع مستقل

هاهما المقادير والطريقة على ما نزل الموضوع

مقادير بسطيلة الحوت :

1 كيلو غ جمبا ( قمرون ) + 750 غ كلمار + 500 غ هبرة الحوت ابيض نقصت منو شوية للتزيين + 3 حبة طماطم كبيرة حمرا مقطعة مكعبات صغيرة

2 حبات فلفل أحمر مقطعين مكعبات + تقريبا 5 م ك قزبور + 2 أو 3 ضروس ثوم محكوكين + 10 ورقات الرند + 3 م ك تحميرة + 1 م ك كامون + نص م ك إبزار +

نص م ك سكنجبير + ملح حسب الذوق + الحار حسب الذوق ( لذتها تكون شوية حارة لكن ماشي بزاف ) 1 علبة صلصة الطماطم solis أو أي صلصة تفضلوها

2 علب الشعرية الصينية كبار + زيتون أخضر مقطع + نص حامضة مصيرة مزولة ليها اللبابة + الزيت بلدية ورومية + 1 علبة شامبنيون

الطريقة :

نعمل الكلمار فالزيت هو الأول ومرة مرة نحرك حتى يبدا يتطرطق غير يبدا يطرطق نعرف انه طاب نضيف عليه الفلفل احمر يدبال ونضيف الثوم محكوك ( راجلي كان مسافر

تبرعت بالثوم مزياااان هههههه ) نضيف القزبور غير تبدا تطلع ريحت الثوم تطلع نضيف التوابل كلها والملح ونخليهم شوية ونضيف مطيشة و الصلصة ونزيد الجهد للعافية

ومرة مرة نحرك هاد العملية كتخلي مطيشة تطيبة بسرعة وتنشف شوية من الما نضيف الكروفيت وطريفات الحوت ونخليهم يطيبو شوية ونضيف الزيتون الشامبنيون ونخليهم شوية يطلقو فبعضهم

نغلي الشعرية الصينية فالماء وحد زوج دقايق ونقطرها ونقطعها بالمقص ونضيفها للخليط ونخلط مزيــــــان

أنا فهاد المرحلة كنحيد الرند كلو ومنين تبرد نلوي البسطيلة بالطريقة العادية ونطيبها في فرن ساخن ونقلبها عاد نقدمها باش كتجي لونها محمر بالعطرية إدا شفتها بقات رطبة بزاف

كنردها لتحت الشواية غير تتقرمش شوية

طرياف د الحوت لي شرملتهم بالثوم والقزبور والتحميرة والكامون ليبزار والملح والحار وشوية د الزيت نعمرهم فقطيبات د الخشب لي سبق رقدتهم فالمسا ساعتين باش ميتحرقوش

وندخلهم للفران ونقدم بسطيلتي بالصاحة والراحة

قد يعجبك أيضا