بالمقادير والصور هادي واحد العراضة وجدتها  لصحاب راجلي درتها قبل شي اسابيع…كيف جاتكم؟

مقادير الكيك:
تقدري ديري اي كيك الشكلاط فالمول العجيب
زوج بيضات
رشة ملح
ربعة معالق كبار سنيدة
فانيلا
نخلطو الكل ونضيفو
ربع كاس زيت
نصف كاس حليب أو يوغورت
زوج معالق كبار كاكاو مع كاس الفورص ومعلقة صغيرة الخمارة مغربلين ونطيبوها فالمول العجيب فاش تبرد نسقيوها بالحليبالكريمة:
على نار مهيلة كنديرو كاس الكريمة السائلة وكنذوب فيها 200g ديال نوكا ونخليوها حتى تبرد مزيااااااان في الثلاجة ونعاود نطلعوها بالطراب الكهربائي
التزين حسب الرغبة(( انا درت اللوز محمر والفرمبواز))
هادي هي نوكا لي استعملت فيها المذاق ديال البندق لي مالقاهاش يعوضها بنوتيلا ولا اي نوع الشكولا تتعجبو.

لحم العراضة
نعطيكم قياس زوج كيلو وانتم ضاعفو المقادير عند الحاجة
زوج كيلو داللحم
الملح
راس معلقة البزار
معلقة الخرقوم
معلقة سكنجبير
2شعيرات دالزعفران الحر
2حبات المسكة الحرة مطحونة
5فصوص الثوم
كنشرمل اللحم بهاد المقادير ونخليه فالثلاجة مغطي
في طنجرة كندير نصف كاس زيت العود ونشحر اللحم فيها حتى يتغير اللون ديالو ونزيد عليه ثلاثة البصلات كبار مشلظين
ربيطة صغيرة دالربيع
ومعلقة ديال اللوز مطحون(( وهادي من الأسرار لي كتجيب المرقة خاترة ولذيذة))
وزوج تمرات (( وهذا سر اخر.. التمر كيطلق واحد الحلاوة خفيفة فالمرقة والعظام كيخليو اللحم يطيب بسرعة
فاش يطيب اللحم مزياان كنحيدو ونحطو فطبسيل كيدخل الفرن.. والمرقة كنبقا نشحرها حتى توقف(( والا جاتك قليلة زيدي جوج بصلات اخرين مشلظين وخليهم يتشحرو)) وكنحيد عظام التمر
فوقت التقديم كنشعل الفرن على اللحم منها كيسخن ومنها كيتشمع شوية وكيشد فراسو ونحطو مع الدغميرة ونزوقوه حسب الرغبة (( بالبرقوق والمشماش معسلين والزنجلان واللوز والجوز)) وبالصحة والراحة.

السلطة
ساهلة ماهلة وكنخدم بلي موجود.. غير هي كتشد اليد شوية .. لي عندو الوقت يقدر يبدع اكثرالروز مسلوق بضرس الثوم والملح كنضيف لو الطون دالزيت بزايد ..فلفلة بالالوان مقطع مكعبات .. الكورنيشو مقطع .. الذرة.. المعدنوس.. مليونيز .. ويوغورت مسوس ..معلقة الكتشب.. بودرة الثوم.. الملح الابزار.. معلقة الخل.. راس معلقة سنيدة .. زيت زيتون وكنخلط الكل ونخليه يبرد
بالنسبة للمرافقات
الافوكا بالمايونيز والملح والابزار والحامض والسوريمي وتفاحة مقطعة رقييقة والكورنيشو
الباربا مقطعة مع بصلة حمرا مشلظة رقيقة الملح الابزار الحامض زيت زيتون والمعدنوس
البطاطا مسلوقة وصوطي فالزبدة
لاريكو مصلوق نصف سلقة وكنشحرو في زيت زيتون مع الشومبينو والثوم والمعدنوس
والابزار والملح
الكروفيت مشحر فزيت اركان ((كيعطيه طعم غزاال))والمعدنوس والملح والابزار
والكلمار كندير لو نفس الطريقة بأركان
التزيين حسب الرغبة.. انا زدت شوية ديال الطماطم الكرزية والخيار والفجل مقدنيش الطبسيل حطيتهم بحدهم فالجناب
المهم البنات هادي السلطة عموما وانتم تقدرو تبدعو اكثر

مقادير الديسير باللوز مكرملكاس الحليب
كاس القشدة
كاس الحليب المحلى المركز
فانيلا
زوج معالق النشا
كنخلط الكل على نار مهيلة حتى يعقاد الخليط ونضيفو لو زوج كيري (( اختياري ماشي ضروري))
بالنسبة للوز.. على نار مهيلة كندير نصف كاس سنيدة (( حتى الأسمر كيجي مزيان))
حتى ترجع كراميل وتضيف لها اللوز محمر (( او خليط من المكسرات)) ونعسلو معاها زوج دقايق ونسرحو على ورق الزبدة ونخليه حتى يبرد ونهرمشو
والتزيين حسب الرغبة.