خلطة الخل وبيكاربونات الصودا كتهنيني من الزفورية والدهون ورائحة الدم  فعيد الاضحى

السلام عليكم حبيباتي من ضمن تحضيرات عيد الاضحى المبارك ارتايت اليوم  اني نقدم ليكم هاد المستحضرات الرائعة لي كتهنيني من الزفورية في المنزل وكذلك الخلطة الرائعة لازالة الدهون الصعبة وكانعقم بيها الاسطح والبوطاجي كذلك البوطة فعيد الاضحى.
المكونات:
الملحة الحية ،خميرة الحلوى او بيكاربونات الصودا،الخل،الزعتر،صابون الاواني السائل.
طريقة الاستعمال:
بالنسبة للملحة الحية انا كنستعملها فتنظيف احشاء الخروف لاني كانفضلها على الملحة العادية لانها مجهدة،كانخدو اناء نعملو فيه ماء ونديرو طرف ديال الملحة الحية راها كذوب،وننقعو فيها احشاء الخروف لي نكونو نظفناهم من قبل.
بالنسبة للزعتر يمكنلك تعوضيه بالورد او الخزامى كذلك القهوة او قشور الحامض انا كنستعملو باش نحايد رائحة الزفورية لي كتبقى فالمنزل ،كاناخد كاسرول نعمل فيها الماء ونديرو فيه الزعتر ونخليوه يطبخ مزيان،وبهاد الطريقة كنتخلصو من هاديك الرائحة لي كتكون عندنا فالمنزل.
واخيرا خلطة التنظيف العجيبة ،ناخدو ملعقة ديال بيكاربونات او خميرة الحلوى نضيفو عليها ربع كاس ديال الخل غادي يحدث واحد تفاعل وفوران،خليوها حتا تهدا وعمروها فبخاخ وضيفولها كاس ماء و ملعقة كبيرة من صابون الاواني السائل، هاد الخلطة رائعة وكتقضي على الدهون بكل سهولة.