يلا تحرق ليك المصلوح تنظيفو من أسهل ما يكون ..دخلي تعرفي السر

السلام عليكم ورحمة الله تعالى وبركاته
عندي مصلوح بحال هادا تماما.

فغفلة مني سخن بزاف وحرق لي واحد المنديل ,وبقى لاصق فيه او ولى حرش وكحل كيلصق فلحوايج ما بقاش صالح للصليح أبدا. بحال هاذا.

ما خليت باش نضفتو استعملت الحامض, الخل, الزيت, لاسيطون, الشمع, الصابون, الجورنال, الاسبيرين ,……………..
لكن حلف لا بغى يزول منو الحراق.
وأخيرا هداني الله لهاد الحل.
خديت منديل ديال القطن غليض طويتو على 4 وصبيت عليه كمية كبيرة ديال الخل الابيض وفوق منها معلقة كبيرة بيكاربونات الصوديوم ولى المزيج كيغلي ويعمل فقاعات تم دوزت المصلوح سخون .

وكانت المفاجأة المصلوح ولى كيشعل شعيل بحال الى عمرو ما تحرق والحديدة ديالو ولات نظيفة وكتلمع.بحال المرايا.
والتقب لي فيه نضفتها بعويدات الاذنين ومسحت المصلوح بمنديل نقي .

وقلت الحمد لله.كسبت مصلوحي.
طبعا كاينة مواد خاصة بتنظيف المصلوح وكاين هاد الغشاء الواقي ولكن للاسف ما لقيتهومش فالسوق.

واخا يكون مصلوحك نقي ما فيه والو عملي هاد الطريقة غيولي كيشعل بحال يالله شريتيه .
وما تنسايش تدعي معايا.