هدي الطريقة لي متبعة فتنظيم ثلاجتي كتبقا نقية كتشعل وكلشي منظم فبلاصتو وحتا من الخضر كتصبرلي مدة طويييلة

السلام عليكم الغزالات، هادي فكرة اقتصادية وفي نفس الوقت كتنظم لك الثلاجة أو الكونجيلاتور وكتحافظ على النقاوة ديالهوم مدة طويلة .

استعمال خنيشات الميكة الصراحة مشي عملي بزاف ومشي اقتصادي خاصك كل مرة تشري ميكات جداد في حين أن هاد البلاستيكات يكفي أنك تغسليهوم وترديهوم .هاكا غتوفري فليسات شري شري ديال الميكات .
حتى من الناحية الجمالية خناشي ديال الميكات كتولي الثلاجة كولها خناشي مرونة وخا تعياي تقادي كيجي المنظر خايب ،الفكرة أنه غتفرشي سربيتة وتستفي عليها الخضر وتغطيها مزيان .ومرة مرة إلا بانت لك غطاية ديال بواط فازكة تحليها وتمسحيها وتمسحي حتى جناب إلى بانلك شوية ديال الندى بالبرودة .
ممكن تخصصي كل بواطة لنوع من الخضر. والبواطة الكبيرة ديري فيها الخضر كبيرة بحال كرنب أو…. أو ممكن تخلطي فيها خضر كل واحدة في سربيتة ديالها .
ممكن ديري فيها الفواكه بحال البرقوق و… بنفس الطريقة .
ممكن تخصصي واحدة للقزبور معدنوس أو النعناع …. المهم كيبقا لك الإختيار .
بالنسبة للكونجيلاتور الكبيرة ممكن نخزنو فيها الخبز أو المعجنات بصفة عامة بعدما نلويوها في سربيتة .
ممكن نخصووحدة للحوت وحدة للدجاج وحدة للحم . يعني ممكن نفرشو ميكة ونستفو فوقها الحوت طراف ونديرو فوقها ميكة ونستفو طبقة تانية وهكذا حتى نكملو أنواع الحوت .ملي تبغي تاخذي نوع معلك غير تهزي ميكة وتاخذي منها وترجعي الباقي،نفس الشيء بالنسبة للحوم الأخرى . طبقة للجوانح طبقة للفخاض …. اللحم كذلك كل طبقة على حسب الإستخدام .
ممكن تخزنو فيها اللوبيا الجلبانة وجميع الخضر .
هذه الطريقة كتخلي الكونجيلاتور مرتب ومكتوحليش مع الميكات مشتتين .كل عليبة مستفة فيها الميكات الخاصين بها .
أتمنى نكون وصلت الفكرة .
وبالصحة والراحة.

إليكن الصور حبيباتي .