هاذي هي العراضة لدرت لصاحب راجلي ومراتو وماماه بالتفصيل الممل تفضلوا !!

عراضة من احدى الاخوات من منتدى اناقة مغربية :

مساء وصباح الخير كيف حالكم أخواتي إن شاء الله تكونوا بألف خير .
كانوا جاو عندي صاحب راجلي ومراتو وماماه إيوا ودرنا ليهم الضيافة درت حطا لرجلي وصاحبوا وماماه وأنا والسيدة حطينا لينا بوحدنا درت ليهم 2 دجاجات هما بثلاثة وحنا بجوجات دجاجة
واللحم حطيت ليهم كيلوا وحنا نصف كيلوا وجاوا عندي الخميس اللي فات إيوا ندخل في الموضوع هههههههههههه وبلا كثرة التعاويد هههه.
إيوا نهار الأربعاء خرجت تقديت داكشي اللي خاصني ورقدت الدجاج في الحامض والملح لمدة ساعتين ثم شرملتوا ب
(قزبر ومعدنوس , ثومة, نصف حامضة مصيرة ,الحرور, بنة كنور بالزعفران , الزعفران الحر شعرة , إبزار , خرقوم , سكين جبير , زيت الزيتون وزيت الرومية ) وخليتهم ترقدوا حتى الصباح .

وفي هذه الأثناء سلقت بطاطا , خيزو , الروز بسمتي وعملت كل حاجة في بواطة وخليتهم في الثلاجة .

إيوا في الصباح بيني وبينكم مافقتش بكري هههههههه صايبت فطورنا أنا وزجي الحبيب وشمرت على دريعاتي ههههههه 
رقدت 1 كيلو ونصف اللحم ديال العجل بدون عظم فيما يلي : 
( قزبر , خرقوم , زعفران الحر شعرة , بنة كنور الزعفران , سكين جبير وزيت الزيتون ) لمدة 3 ساعات وخليتهم .

ومشيت جمعت الصالون والدار كاملة ودوزت لاسبيراتور وكنت رقدت اللوز في الماء الساخن وفسختوا وخليتوا يتسقطر .

 

خديت الكوكوت عملت فيها الزيت البلدية والرومية حتى سخنات ضفت 2 بصلات مشلظين رقاق حتى تدبلات وضفت الدجاج المرقد (لقيتوا طلق الماء ديالوا ) وضفت السمن الحار قليتوا مزيان ومهلت عليه البوطة على حدها وخليتوا يطيب .

وفي كوكوت ثانية عملت زيت الزيتون والرومية وقليت اللحم مزيان وضفت 2 بصلات حتى ذبلات وضفت ( البقدونس, الثوم , إبزار , الخرقوم , سكين جبير , قرفة ,والسمن الحار )
وقليت كلشي مزيان وضفت كاس صغير ديال الماء وسديت كوكوت ونقصت البوطة على حدها وخليتوا يطيب .

وغسلت الأواني اللي توسخات ثم قرطت المكور رقيق وعملتوا في بواطة ودخلتوا للثلاجة .

هانا لقيت الدجاج طاب صفيتوا في واحد الشبكة وخديت الكبدة والقلوب سلقتهم شي 10 دقائق وضفتهم هما والزيتون للمرق حتى ختار

وطفيت على اللحم بعد 20 دقيقة لقيتوا طاب بزاف .
خديت البرقوق سلقتوا في الماء حتى طاب نصف طيبة وصفيتوا من الماء الأسود ديالوا وضفت ليه الزبدة وماء الزهر والقرفة والسكر خليتوا حتى تعسل مزيان وطفيت عليه وقليت اللوز في زيت باردة وعلى نار مهيلة

صافي غسلت الأواني اللي توسخوا عاودتاني ومسحت الدار بجافيل والشامبوا وقديت الديسير في الطباسل وكيكة وبيسكويت واللوز والتمر والكيسان ديال العصير.

وجبدت مطيشة قطعتها وضفت ليها الفلفلة حلوة مشوية والخيار وتبلتها بملح , كامون , إبزار وزيت الزيتون .
الروز ضفت ليه الفول مدمس ( معلب ) والزيت البلدية , ملح , البقدونس .
بطاطا ضفت ليها بقدونس ملح إبزار زيت الزيتون .
خيزو ضفت ليه المايونيز
والمكور أيضا ضفت ليه المايونيز وقاديت السلاطات في طبسيل كبير وغلفتهم بالنايلون ودخلتهم للثلاجة إيوا ووجدت كيسان الموناظا .