هادي حوتة فالفران معمرة بحشوة عجيبة درتها لصحاب راجلي فالفطور و حمقاتهم

ليوم كنقدم ليكم حوتة البغار معمرة في الفران هذ النوع ديال الحوت تيجي لذيذ بززاف ومع طريقتي في التحضيرغادي يعجبكم بززاف ومتاكدة غاديين تجربوه نخليكم مع المقادير : حوتة كبيرة منقية ومفتوحة من الظهر

2 بصلات كبار

 2 فلفل أحمر مقطع مكعبات

8 أوراق الرند

8 مطيشة كبيرة

باقة من القزبور

الشعرية الصينية

ليمون مصير

زيتون مخلي مقطع

كلمار
قمرون

طريفات د سبادا

شمبنيون

زيت بلدية ورومية

تحميرة + كامون + إبزار + سكنجبير + ملح + شوية الحار إختياري

كنحمر شوية البصلة مع القزبور ونضيف أوراق الرند
و ضفت الفلفل والتوابل
حيدت شوية من الخليط وضفت على الباقي شوية د مطيشة لي طحنتها فالخلاط الكهربائي
ضفت نصف كمية القمرون والرجيلات د الكلمار لي سلقتو الدوائر د الكلمار وسبادا كنخليهم للأخير
منين طابت الحوت ضفت الزيتون والليمون والشنبيون خليتهم شوية وضفت عليهم الشعرية الصينية
خلطت مزياااااااااان ووخليتهم يبردو شوية
شرملت الحوتة بشوية د الخليط لي نقصت فالأول وفتحتها باش نعمرها  و عمرتها  و خيطتها
لقيت بلي الحوتة لي عندي كبيرة بزاف على أكبر مول عندي لذالك غلفت صينية د الفران بالأليمنيوم وطيبتها فيها
كبيت مطيشة لي طحنت ومعها الخليط لي نقصت فالأول والحوت لي خليت وضفت شوية د الملح لمطيشة وحتى الحوتة ملحتها بوحدها
وضعت الحوتة وخليت الصوص تكون غير فجنابها
ودخلتها تطيب فالفران على عافية مهيلة وفكل وقت كنلقاها خصها شوية د المرق كنضيف شوية د الما لي سلقت فيه الكلمار خليتها حتى تنشف  وقدمتها مزينة غير بطريفات د الليمون
جات رائعة وصحاب راجلي عجبتهم بزاف ( مين يشهد للعروسة هههههه )
كنتمنى تنال إعجابكن وتجربوها إن شاء لله
تحيــــــــــاتي

من الأخت المشرفة: أم اسامة و ايمان