ناموسيتي عيات شوفو كيفاش جددتها و رجعات بحال يلا عاد شريتها و غير ب 250 درهم!!

ناموسيتك عيات هاكيف تجدديها وتولي بحال إيلا عاد شريتيها, وبهذه الطريقة توفري فلوس الناموسية وتجددي بهوم بيت النعاس ديالك أو ديري بهوم حاجة أخرى .

فكر ة الناموسية عملتها تقريبا شهرين هادي يعني قبل مندير الإصلاحات لبيتي. فسولت مول لمضارب قالي كيعملو وسطها الفرشي .متخلعوش راه الفرشي الخاص بالمضارب. ولك الإختيار بغيتيها رطبة ولا واقفة يعني قاصحة بلحق غي شوية . وراها في كلا الحالتين كتولي خفيفة تهزيها غي انتي .أنا قلتلو ديرها لي قاصحة .

وتبارك الله جات غزالة واقفة وخفيفة حتى في الهزان .الثمن أحباباتي قالي 250 درهم .بلحق راه عندي ناموسية ديال بلاصة وحدة حيث ممزوجاش . أنا مبدلتش غلاف الناموسية حيث كان باقي مزيان . حيث كنت مهلية فيه . بربي إلا واحد المرة في الصيف ليفات غي ماقالي راسي هادشي قبل منعملها الفرشي طلعتها للسطاح وضربتهالها بتدويشة فاعلة تاركة بالصابون وجافيل .قولت مع راسي لي ليها ليها. إو شللتها مزياااااااااااااان وهي مسكينة كطلب الشرع. وخليتها في السطاح .مالين الدار شبعو ضحك حيث عمرهوم شافو ناموسية كتغسل. لكن ختكوم بقات فيها ناموسيتها عمرها متحمحمات هههه إو خليتها في الشمس .آش غنقولكوم رجعات تبارك الله New كتشعل .

نتمنى نكون وصلت الفكرة باش تصلحو وتغيرو بلا ما تهلكو .