مسمن الموظفات ساهل ماهل و بطريقة تربحك الوقت..فكرة كنت سمعتها فالراديو وعجباتني بزاف
اليوم الغزالات بغيت نوريكم واحد الطريقة ديال المسمن مربحة للوقت و مزيانة بالنسبة للنساء لي خدامين.هاد الفكرة كانت سمعتها فالراديو…و كيمكن لهم ديما اصاوبوه و يخبيوه في المجمد.
بلا ما نطول عليكم…نهدرو فالمفيد هههه …
كتاخدي الدقيق ديالك قياس و يكون من 2 انواع فورص وقمح مغربل وديري ليه الملح+شوية سنيدة +خميرة حمراء
وعجني بالماء و د لكي مزيان وتكون العجينة مرخوفة رطبة.تم قسميها على 4.من جهة اخرى خدي زبدة مركرين ودوبيها وزيدي ليها 2 نقطات خل+خميرة
واخاغينفخ الخليط لكن حركيه شوية غيولي عادي.تم وجدي حداك هاد الخليط فزلافة+زلافة اخرى فيها زيت(للدهن)+زلافة اخرة فيها سميدة رقيقة.
كتاخدي الكورة ديال العجين وغطسيها كلها فالزبدة تم مرريها فسميدة كلها تاني وخدي التانية نفس الطريقة تم ديري واحدة فوق واحدة .من الاحسن خدمي
فوق شي مائدة كبيرة ودهني فين كتخدمي تم ورقي مزيان بيديك حتى تولي العجينة رقيقة ورشي بالزيت وجمعي الاطراف ديال العجين على شكل مربع
غادي اجيك كبير …ماشي مشكل…..خدي الجرارة وقسميه على 4.تم كملي ما تبقى من الكورات نفس الطريقة جوج جوج .المهم كل مربع قسميه على 4
.ملي تكمليهم و تقسمي المربعات الكبيرة تحصلي على مربعات صغيرة.وهاكدا تكوني ربحتي 4 بلاصة واحد…..تم تسرحي كل واحد عادي و دهني بالزيت و
طيبي وتكوني طيبتي 8 عوض 4 او 16 عوض 8 دلمسمنات…
و متنساونيش بدعواتكم الطيبة و بارطاجيو هاد الموضوع باش كلشي يستافد و تديو الأجر في سبيل الله.