لي دخل لداري كيشكر ريحتها لي ديما منعشة وكتحمق…دخلي نوريك كيفاش

مساء الخير يا الحادكات الغزالات، نتمنى تكونو فكامل الصحة و العافية، اليوم جبت ليكم حيل صغيرة باش الريحة فداركم تكون ديما غزالة و تقضيو على البرودة و المشاكل دياولها. السر هو الخزامى، الورد، و المسك.

نبداو بالمضارب، خودي جوج حفنات خزامى، و جوج حفنات ورد و رشي بيهم التحتاني ديال المضارب ملي تكون هازا الصالون، و فكل قنت قبل ماتهبطيهم و تلمطي حطي شوية ديال المسك. نفس الشيء بالنسبة للماريو، باش تقضي على البرودة و تكون ريحة حوايجك غزالة، خودي غشاء ديال شي مخدة مابقيتيش باغياه، عمريه بشوية ديال لاواط، و زيدي حفنة ورد و حفنة خزامة و قطعة مسك، سدي الخدية مزاين باش مايتشتت ليك والو، فركيها شوية بين يديك و حطيها فالماريو، ممكن تحطي فكل طبقة مخيدة اذا بغيتي.

كذلك بالنسبة للغرف باش تعطي فيهم نسمة غزالة، عمري كموسات صغار ديال التوب، من الاحسن يكون رهيف باش يدوز الريحة، و حطيهم فالقنات، فالفيترينة و فالحمام. جربوها غادي تعجبكم بزاف و ردو عليا الخبار.