لي بغات تقتاصد فالمصروف وتتعاون على الزمان تدخل ..أفكار مهمة ضروري تعرفيها
المهم احيط علمكن حبيباتي حتى انا مكلفة بالمصروف وبما انني في الغربة تتعرفوا الاورو كيطير ومع الغلاء، فالحياة مليئة بالتجارب لي تخلينا نكتسبوا الخبرات بالاحتكاك مع الايام، المهم من مصروفي تنخرج منو الشهر وحتى ملي تنهبطوا المغرب تنشيط الخير والبركة ونرجع معايا صريرتي ههههههه معقودة مزيان ايوا اشنو نخليوا الزمان يضحك علينا ، والان اجيوا معايا لهاذ الخطة لي فعلا مريحة وتخليك لابسة ومشيكة ومخيطة الجديد ماشي لي طاح في ايدي اجي نمشي نتقدا ديما غادة هازة قفتك وتجري خاصني خاصني خاصني لي خاصنا نخليوا دار باباها ههههههه قولوا لي دخلي للمفيد وبلا ثرثرة
طيب قلنا بالنسبة للكمية ديال الفلوس 3000 و4000 وحتى 5000 بحال بحال عندها نفس البرنامج
المهم اكيد غادي تكونوا كتعجنوا الخبز في الدار ولي ما كتعجبن غير تعيد نظر لان الخبز ديال الزنقة كل ساعة مافيهش البركة ومافيه حتى فائدة بقدر ما هو تيقربك كل مرة للطبيب اكثر، وحنا شعب مستهلك لهاذ المادة لي عندنا رئيسية ولهذا خاصك تعتمدي على الخبز ديال الدارومع الوقت ديري في بالك انك تجمعي حصيصة للعجانة لانها غادي تسهل عليك هاذ المامورية ولي هي العجين كل ساعة، وعليه نرجعوا للخبز واشنو خاصنا ليه خاصك تشري الزرع العبرة كدير 40 درهم شي وحدة تبع معايا وتسجل الاثمان باش نخرجوا راسنا من حيرة المصروف والتفكير فيه يخليك تالفة
نرجع 40 او 50 درهم عبرة الزرع حسب الجودة غادي تغسليها وتنقيها وتديها للطاحونة ب15 درهم ما يغربلو ما والو يعطيه لك كامل غادي تغربليه راسك تعزلي النخالة الغليضة والباقي تخليه هكاك لانه صحي وغادي يهنيك من مشاكل المصران والصحة بصفة عامة
السقاطة عند الهري نخصوا لها 500 درهم
تمشي للهري خصي 500 درهم جيبي فيها السكر 6 كيلو ب30 درهم و5 كيلو فورص و5 كيلو فينو وباكية اتاي كبيرة باكية الخميرة حبيبات ما كتخسرش وجيبي بيدو الزيت 5لتر ولتر ديال زيت بلدية سوس ولا البركة خذي 2لتر من زيت رومية وخلطيها بلتر بلدية وهاهي عندك 3 لتر زيت باش طيبي الطاجين او لي بغيتي وتيبقى لك الاخر للقليان او المسمن الخ جيبي حك ديال اوني الكبير رطبي في قرعة مع الماء وخبي لاخر تيدي شهر و5 لتر سانيكروا ديال العبار وقسميها على جوج بيدوات ضيفي لهم النص ماء والنص جافيل العبار وخذي معاك قرعة الروح ديال سانيكروا ضيفيها لهاذ جوج بيدوات غادي تولي عندك 10 لتر من سانيكروا لي تقدر تدي لك اكثر من شهر وطبعا جافيل العبار 5 لتر للتنظيف والحوايج تشري اتشي لتر وخلطي معاه 2 لتر ماء وهاهو جافيل خاص فقط للحوايج البيضين مع انني تنديرو فقط للفاط البيضين قرعة المربى كبيرة نص كيلو الزبدة باكية الفرماج مثلث لتر الزيت بلدية حك الحليب نيدو ديال 30 درهم ديري منو قناع لوجهك يصفيه وينورو ههههه حك ميلو كبير ب70 درهم وطبعا البوطة 40 درهم في الشهر او 80 درهم الى كانوا 2 بوطات وفي الغالب ما تيخواوش في مرة انا عندي ديما السكور 3 وحدة ديما تكون عامرة لوقت الحزة والضرورة،العطرية شوفي القرعة ديالك شحال كتهز وبها تكون عينك ميزانك مثلا نص رابعة من الحاجة 8 الدراهم لكل من البزار السكين جبير الكمون القرفة التحميرة جيبي رابعة ب10 دراهم شوية الزعتر شوية اللويزة باش تهبطي الضغط وتريحي نفسك وتزولي التوتر مرة مرة كنظن لحد هنا كلشي مزيان
نجيوا للخضر والفواكه واللحوم
نديروا 200 درهم لحوم و150 درهم خضر وفواكه
اولا تقدري تمشي للسوق الاسبوعي كتكون فيه الخضر جديدة وثمنها مناسب وطبعا الاساسيات هي الاولى سبقي 5 كيلو بطاطا 5 كيلو بصلة وغادي تكون عندك فكرة مسبقة على اشنو غادية طيبي في الاسبوع يعني تقسمي ايام الاسبوع حسب المستطاع والرغبة
مثلا عندك خيزو 2 كيلو كيلو فلفلة كيلو خيار كيلو لفت كيلو قرعة اللوبية اهم شيء حرصي على خضر الموسم، المهم نخلي لك القائمة انتي حرة فيها الكرافس والقزبر ومعدنوس ما تنسايهمش، شلاضة باربا الخ … من بعد تمشي عند الجزار خذي كيلو ونص او جوج كيلو لحم غادي تقسميهم على حسب الاشخاص وطبعا ما تنهضروش على الضياف فقط الاشخاص ديال الدار وتقادي بهم مسيرة الشهر كيلو تقلية دجاجة 2 كيلو تقسميها على جوج وديري في اعتبارك اخر الاسبوع الحوت السبت القليان او المشوي والاحد الطاجين او لاطة، الفواكه حسب الموسم نص كيلو من الحاجة فواكه مشكلة فيها الخير والبركة، البيسيري تتجيبي يوميا حليب طري حسب الرغبة سنطرال او جودة او لي حبيتي يوغورت ، دائما يكون عندك شوية الحلوة مخبي الى جا عندك شي حد على غفلة فقاص وشي شكيلات من الصابلي والبريوش تقاديه راسك عندي طريقة زوينة ما فيهاش تمارة وتيطلع روعة خذيتها من هنا نيت يعني عطى الله ما يدار خاص غير الهمم .
الى نسيت شي حاجة نخلي لكم الفرصة فين تكون المداخلة ديالكم الي عندها شي اضافات ضيفها والله يسر الامور ويرزقنا من فضله واحسانه