كيعدبوك السطولا دلحمام فالهزان……الحل كاين هنا

فكرة الأخت ”نسمة الصباح” والتي تقول

منين كنجي غادية للحمام كنهز الهم للسطولا

حيت كاملين نفس الحجم والشكل

كندير واحد فوسط واحد ونهزهم كاملين بزوج يدين قدام صدري

ودائما كتجيني القضية غير عملية ومتعبة

فكرت فالحل والحمد لله لقيتو

كناخد لاستيك ونعقدو على شكل دائرة ونعملو فالسطل من الجهة لي لاصقة فيها اليد حدى الخرصة

بلا ما نعقدو غير نحطو من تحت اليد نلوي ونجر وهاهو تابت.

نعاود نعمل واحد اخر من الجهة التانية

كنخلي لاستيكات خارجين مع جناب السطل ثم كندير كاع السطولا لي عندي وسط داك السطل ويكونو مقادين اليدين ديالهم والخراص مع السطل الاول التحتاني لي لصقت فيه لاستيكات تم كنجبد داك لاستيك ونبدى ندور على الخراص ديال السطولا 2 دورات او اكتر ونزير مزيان حتى يكمل.

نفس الشيء كنديرو من الجهة الاخرى.
وهاهوما السطولا مقبوطين مزيان ما عليا غير نهزهم من اليد ديال السطل الفوقاني بلا ما نخاف يطيحو لي تحت منو.
كنتمنى الفكرة تكون وصلات..
منين ندخل للحمام كنحلهم ومنين نجي خارجة كنعاود نقبطهم.وهاني هانية.
وما كننساش مرة مرة نبدل لاستيك منين يترخى.
طبعا المشكل ما كيتطرحش الى كان عندك سطل كبيييير كتجمعي فيه السطولا كاملين وتهزيهم من يديه.
هاد الفكرة جاتني مزيانة بزاف ولي شافها عندي عجباتو وطبقها .
وكاينة فكرة اخرى اجمل وأريح وهي انك تخيطي صاك من البلاستيك يكون بالغطاء ديالو بالسنسلة واليد وتخشي فيه السطولا وتسدي عليهم وتهزيه من اليد ديالو.