كراتان البطاطا بالأعشاب المنسمة..خفيف ولذيذ ومكوناته جد بسيطة

هاد الكراتان كيجي لذيذ وخفيف ومكوناته جد بسيطة

المقادير 

– حبة بطاطا منقية ومغسولة ومقطعة رقيق بحال شيبس
– معلقة صغيرة أعشاب مخلطة (زعتر وزعيترة وآزير)
– زيت بلدية
– شوية ملح وفلفل أحمر عادي أو حار للي كيعجبها الحار
– فرماج محكوك

الطريقة :

جد بسيطة ، بعدما قطعنا البطاطا على شكل شيبس كنغسلوها ونسقطروها مزيان ، ومن بعد نرشو عليها شوية الملح ونخلطوها باش تملح كاملة ، من بعد كناخذو مول خاص بالكراتان حجمه على حسب كمية البطاطا لي غادي نستعمل ، وكنبدا نتسف في بطاطا ، وبين كل طبقة وطبقة كنرش الأعشاب والفلفل الأحمر ورشة من الزيت بلدية ، وهكذا حتى نكمل بطاطا لي عندي ، بحال لي موضح بالصورة

ملي كنكمل كندخلها للفران لي سبق وسخناه ، تقريبا كتاخذ من 45 حتال ساعة ، على حسب سمك الكراتان ، وأحسن حاجة باش متاخذش وقت بزاف استعملو مول كيستد باش يساعد بطاطا طيب دغيا
حتى شكلها ملي خرجتها من الفرن

آخر حاجة وهذا كيبقى اختياري ، كنرش على وجه الكراتان فرماج محكوك ، أنا هنا استعملت فرماج احمر والموزاريلا ، ورجعتها للفران حتى يذوب الفرماج

وهذا الطبق النهائي ، تقدرو ترافقو بيها أطباق الدجاج أو البانيني أو أي سندويش عوض بطاطا مقلية

وبالصحة والراحة.