علاش تشري خزانة للأحذبة ونتي ممكن تصنعيها فدارك بهاذ الأفكار لي غتهنيك وترجع دارك منظمة
السلام عليكم و رحمة الله،
اول حاجة دائما قبل ما نشريو اي خزانة للاحذية ندوروا فالدار واش عندنا :
1 – شي خزانة قديمة ديال الكتب (دائما تقدر تفيرنيها و تبان جديدة) او تغلفها بشي ستيكرز او بشي طريقة زوينة..
2 -او مثلا دوك الخزانات المصنوعين من القصب عرفتوهم؟ يقدروا يصلحوا لهذه المهمة و لا اظن انهم غاليين..
3 – او ايطاجيرات شايطين ديال ماريو او بلاكار من بعد اصلاحات في البيت ما بقيتوش محتاجينهم بحال هدوا تقدروا اما نتوما و ذكائكم تصايبوهم فالدار او تاخذوهم للنجار يصاوبهم بالشكل اللي يناسب ذوقكم و الفكرة اللي تصلح لكم للاحذية.
4- تقدروا تطبقوا موديل مصغر على دوك لخزانات ديال الاحذية اللي تيكونوا فالمساجد ما عليك غير تصوري الموديل بالبورطابل او ترسميه و تعطيه للنجار يتكلف به.
5- الخزانة مشي بالضرورة تكون كبيرة بزاف. اقتراحي هو لكل فرد من الاسرة يكون عنده جوج او ثلاثة ديال المربعات خاصيين بجوج او ثلاثة الاحذية اللي تيلبس في الغالب. اما الباقي اللي ما تيتلبسش الا مرة فالاسبوع او فقط في المناسبات، فاحسن طريقة هي يتمسحوا من الغبرة و يتحطوا اما فدوك الكراطن فاش تنشريوا الاحذية و يتكتب على الكرطونة اشنو نوع الصباط باش يسهال الوصول اليه. الا ما كانوش عندك الكراطن بالعدد الكافي ما عليك غير تحطي كل واحد بوحده فبلاستيكة تكون شفافة باش تعرفي اشنو فيها بلا ما تحتاجي تحليها..و هذه الطريقة تتحافظ على الاحذية من الغبرة و عوامل التعرية.
6- نقطة اخرى حاولوا ما امكن ما تدكسوهمش شي فوق شي باش ما يتهرسوش (خاصة الحاجة الغالية)
7- اللي عزاز عليها الاحذية ديالها و بغات تزيد تتهلى فيهم تدير فكل كرضونة كموسة ديال الخزامى و الزعتر باش تبقى ريحته زوينة (هذه الطريقة لابد منها خاصة اللي عندها الغمال فالدار)
8- ضروري ما نجمعوا الاحذية الموسمية يعني الحاجة ديال الصيف ما كاين لاش تبقى شادة بلاصة غير هكاك..
9- الحاجة اللي ما بقيتيش تتلبسيها و ما غتلبسيهاش الا باقي فيها ما يدار صدقيها لشي حد ينتفع بها احسن ما تبقى
عندك و فالاخير ما تبقى صالحة لا لك و لا لغيرك.
10- لابد ما تعلمي راجلك و اولادك القانون ديال الاحذية: ما يوصلش و يرمي اللي كان لابس فوق الاحذية الاخرى سواء دياله او ديال غيره + كل وحد يتكلف بالاحذية دياله و الا العقاب من جنس العمل) انا شريرة ياك خخخ
المهم هذوا افكار اللي ما بغاتش تصرف بزاف ديال الفلوس..
اما اللي بغات تصرف شوية و عندها الامكانيات فتقدر تاخذ اي موديل من هذوا و توريه للنجار يصايبه لها.
(انصحكم تحاولوا ترسموا الموديل لان النجار الا شاف الموديل مصور من الانترنيت غيحسبه عليك باكثر من ثمن اللي شفتي فالانترنيت هههه)
اللي مزال تتبني او مقررة تبني دارها تنصحها تبنيه فالحيط
و تقدر تدير معه sliding door بحال هدوك اللي تيكونوا فالحمام تيتزلقوا الا ما بغاتهمش يبانوا ها بحال اش
اللي عندي فالدار قريب من هذا
هذوا ساهلين ايطاجيرات و ملصقين منهم للحيط و ما غيطلعوش غاليين
و الحل الاخير هو تعلقوهم فالسقف مدليين بحال عند مالين الصبابط و هنا غيتسهال عليكم القضية ههه حيث غتقلبوها بيعة و شرية ههه