علاش الضياع دخلي نقوليك اش ديري بكل حاجة ووفري فلوسك
السلام عليكم ورحمة الله تعالى وبركاته
اليوم بغيت نقتارح عليكم أفكار لمحاربة التضييع والاسراف والتبذير فالماكلة
نبدأ على بركة الله
ـ ايلا شاط ليك شوية د اللحم أو الدجاج أو سمك .. وملقيتي ما ديري بيه : قطعيه طريفات صغار وصاوبي بيه بيتزا أو زيدي عليه الشعرية الصينية والتوابل .. وعمري بيه بريوات أو نيم
ـ ايلا بدات كيخسر ليك الديسير : عصري ربعة د الليمونات وقطعي الفواكه لي عندك وصاوبي سلاض فخوي
ـ ايلا كرم ليك الخبز : دخليه للفران يتحمص وصاوبي بيه شابلور ,أو فزكيه بالماء وحطيه فالبالكون ياكلوه الطيور وتحسب ليك صدقة
ـ ايلا كليتي التمر : جمعي العظام وزيديهم فاش كتكوني كطيبي باش تطيب الماكلة بالزربة ولا حرقيهم فالفران ودقيهم وستعمليهم فشي خلطة ديال الشعر
ـ ايلا بدات كتخسر ليك الكرعة الخضرا : صاوبي بها عصير الكرعة وكيجي غزاااال
ـ ايلا شاطت ليك مقرونية : زيدي عليها جوج بطاطات مسلوقين ومقطعين والبيشاميل والفروماج وصاوبي كراتان
ـ كنتي كتنقي الخضرا أو الفواكه : جمعي القشور وديريهم فشي بانيو مع الما وخليهم 24 ساعة يطلقو ,وستعملي داك الما فشي خلطة للشعر بالحنا ,أولا ايلا كان عندك محيبقات أو جريدة سقي بيه
ـ ايلا التفاح بدا كيخسر : صاوبي بيه طارط ديال التفاح
ـ ايلا عصرتي الليمون أو الحامض : القشور ديالهم حكيهم وديريهم فالفريكو باش تستعمليهم فالكيك
ـ ايلا شاطت ليك المونادا بلا غاز : زيدي عليها مونادا جديدة ومغديش تحسي بالفرق
ـ إيلا شاط ليك الروز : زيديه على الكفتة وطيبيها كيف بغيتي
ـ ايلا شاط ليك الكيك : فرتتيه وديريه فمول وكبي من فوقو كريم كراميل أو فلون ,كايجي رااائع
ـ وباش متخسرش ليك الخضرة : نهار الأحد فالصباح ديري جدول ديال السيمانة وكل نهار أشمن طبق غادي توجدي ,باش تعرفي الخضر لي خاصك والقدر لي يكفيك ,والسيمانة لي من موراها نفس الشي
نتمنى نكون فدتكم ولو بالقليل
تحياتي