عشرين نصيحة من حادكة مغربية كلها تدبير و تاويل

1ــ باش مانوسخ البوطة وانا كانقلي كاندير شويش ديال الملحة في الزيت ولا الزبدة

2 ــ الى زيت القلي كايفيض لي كانرمي فيه قطيعة ديال البصلة وغادي يهبط

3 ــ الى بغيت نقي زيت القلي من بقايا القلي كانسخنو ونرمي فيه ابيض بيضة اخضر باش يجمع كل هذاك لكحولية وينقي الزيت

4 ــ الى بغيت الاكل المقلي نعطيه طعم زوين كانشد 2 ثومات بقشرتهم ونتقبهم بالموس ونرميهم في زيت القلي

5 ــ الى بقيت بلا خبز ومحماد مول الحانوت مسدود كانشد لخبز الكارم وكنرغنو بالماء مزياان وندخلو للفران وهاهوا الخبز واجد ولكن ماتقولي ليهم والو ههههههههه

6 ــ الى بغيت نسافر وانا عندي الكاشير مفتوح ومابغيت نضيعو نشد قرعة ديال الزاج ونحط فيها الكاشير او اي saucisse ونشعل واحد القطعة ديال لقطن فيها ونسدها وهما يبقا معقم لمدة طويلة

7 ــ الى كان عندنا البيض قليل وبغينا نديرو اومليت نزيدو واحد جوج ملاعق ديال الماء ولا حليب ونضربوهم مع البيض وهاهيا لومليت كبيرة وخفيفة على المعدة

8 ــ الى درنا اللحم المشوي في الفران ونشف لينا كانخرجوه ونشدو الزبدة مع بون اكوا bonaqua وشويش ديال السمن الحار ونحطوهم فشي كاسرولا ونسخنوهم وندهنو المشوي مزييان ونغطوه بالبابي اللومنيوم ونخلوه حتى نقدموه والى برد نرجعوه للفران بهذاك البابي

9 ــ الى بغيت نحمر الدجاج كانشد نصف بصلة وفلفلة حارة وربع حامضة و2 ريوس ثوم ومعدنوس ونطحنهم في الطحان ديال الضوء وندير فيهم الملحة والبزار والقرفة وسكنجبير والزعفران وشوي زعتر مطحون وربع ملعقة صغييييرة حلبة مطحونة ونربط الدجاج ديالي وندهنو بالثومة محكوكة ونخليه شوية وندهنو بهذ الخليط ونخليه مرقد فيه بدون زيت حتى نبغي نردو يطيب عاد نضيف البصلة مشلضة مع الزيت

10 ــ الى بغيت الروز يجيني كل حبة بحدها وانا زربانة وماعنديش لوقت نعبر ونستنى نشد مقلة كاندير فيها شوية ديال الزيت ونقلي الروز فيه حتى يتشرب الزيت ونخليه في الثلاجة ووقت مابغيت نطيب الروز ندير منو وماغاديش يلصق (انا كانديرو لسفة كانشد كاميلة كاندير فيها الماء والملحة وشوية ديال الزبدة والزيت الرومية وملعقة سنيدة ونخلي حتى يطيب الماء مزيان ونسخن الروز في الزيت فشي مقلة ومن المقلة للكاميلة كايطيب كل حبة بحدها كانشدو وكاندير ليه الزبدة مع شوية سنيدة وكانقادو في الطبسيل مع القرفة والسكر كلاسي وبالصحة والراحة)

11 ــ باش القهوة تعطيني نكهة اكثر نحط فيها شوية ديال الملحة الحية ونخليها وهكا تحتافظ بالنكهة اكثر

12 ــ بعض المرات الدراري مايبغوش يكلو الزيت البلدية مع الخبز كانشد عريشات ديال لحبق وكانغسلهم ونشفهم ونديرهم في قرعة الزيت ونخليها فبلاصة مظلمة حتى يدوز عليها شهر وكانبقى نحطو فلفطور ريحة ونكهة رائعة كايحماقو عليها ولادي من وهما صغار

13 ــ باش كانوع لولادي على الطابلة واخا الاكل عادي جدا كانشد المايونيز وكنفرقها على 4 وحدة نزيد عليها شوية ديال ماطيشة الحك ونخلطها مزيان وتولي حمراء ووحدة نزيد عليها الملون الزعفران ولا الكوري ونخلطها وتولي صفراء ووحدة كانزيد عليها شوييييية ديال ماء المعدنوس ولكرافس مطحونين وتولي خضراء ووحدة كانزيد عليها لهريسة الحارة و وحدة كانخليها عادية وحتى مع المشوي كانحطها لضياف كتعطي منظر زوين وتخليهم ينوعو

14 ــ الى بغيت نسلق الشوفلور ومايتهرس لي كانقطعو ونغسلو ونرقدو في ماء بارد مع الحامض ونخليه ربع ساعة وندير الماء يسخن ونديرو يتسلق وهاهوا يبقى بحالتو اللي يشوفو يقول ماطايبش وهو رطب

15 ــ باش ريحة الشوفلور ماتبقاش نشد كاسرولا وندير فيها حامضة مقطعة ونديرها تطبخ على نار هادية وكل مانا نطيب الشو فلور ولا الحوت نخليها على النار

16 ــ باش السردين ديالي يجي مقرمش ولذيد كانشد ندوز في الدقيق ومن بعد ندوزو في ابيض البيض ومن بعد ندوزو في الشبلور / الخبز الكارم مطحون ونقليه هما مايهزش الزيت يجي ناشف ومقرمش وشكلو زوين ويبقى شحال ملي نبغي نسخنو في الفرن ويرجع جديد(كانديرها لاي نوع من الحوت وحتى الكفتة وبطاطة)

17 ــ الى كانت عندي لعراضة وبقى لي الدجاج بزاف كانفرتو من لعظم وكندخلو للمجمد وملي نبغي ندير بسطيلة نستعملو

18 ــ ملي نمشي نشري الدجاج كانشد 3 دجاجات ونقول لمول الدجاج يقطعهم طورفة صغاار قد طريفات لحم لقطبان او كل قطعة قد التمرة تقريبا ونيبهم لدار ونغسلهم مزياااااااان ونرقدهم في الثومة والحامض والخل ونفرقهم في بلاستيكات وملي نكون زربانة نخرجهم وندير مقلة فيها شويش تاع الزيت ونشد هذاك الدجاج ونديرلو الملحة ولبزار والزعفران وسكنجبير وكنورة ونخلطو مزيان ونقليه صدقوني تاكلوه بعظاامو وكاتشبعو منو (في رمضان الى ماعندي الوقت باش نصاوب الحوت مانديرو والضياف يسحاب ليهم حوت شحال من مرة كذبت عليهم الله يسمحلي )

19 ــ بعد رمضان كايشيط عندنا الحمص والفول ومرات ماكنستعملوهم حتى يخسرو والضياع حرام الى نقدر نعطيهم والى مالقيت لمن نعطيهم كانشدهم ونديرهم في بلاستيكات وندخلهم للمجمد وملي نبغيهم كانخرجهم

20 ــ الى بغيت الدنجال يجيني ناشف ومقرمش ولذيد كانشدو نفطعو دواور ولا على طول كاندير عليه شويش ديال الملحة مع الثومة والنعدنوس وونخلطو ونشد بيض البيض وندوز فيه ومن بعد ندوزو في الشبلور / لخبز الكارم ومطحون ونقليه يجي مقرمش ومافيه ولا نقطة ديال الزيت من داخل

المصدر : أناقة مغربية