طريقتي لي كولشي كيحماق عليها فطياب اللحم ديال العراضات

نقدم لك لالة اليوم طريقة الأخت رميساء 12 في تحضير لحم العراضات و الولائم :

السلام او عليكم ليوم جبت لكم طريقتي فطياب اللحم لعراضات كنتمنى تستفدو منها على بركة الله نبداو بالمقادير او الطريقة في نفس الوقت هاد الطريقة هي لطلبها ليا العضوات بش نحطها حيت شافوها فلعرضة لي حطيت كنت وعدتكم نحط لكم المقادير او الطريقة ديال دكشي كلو ليوجدت او ها أنا عند الوعد ديالي بديت لكم بلحم او البرقوق او اللوز او غنحط لكم كلشي دكشي ليبغيتو كل حاجة فالقسم ديالها على بركة الله نبداو بالمقادير والطريقة خطوة خطوة

شديت الرجل ديال الخروف او قطعتها

من بعد دارت اللحم ليقطعت فبانيو او زادت عليه شوية ديال الزيت البلدية +الملح +القزبر+البزار +سكنجبير +الزعفران …خليت اللحم يشرب هاد العطرية مزيان مزيان لمدة 3 ساعات

من بعد شديت طنجرة درت فيها الزيت البلدية +شوية الزيت الرومية او خلتها حتى سخنت مزيان

من بعد شديت اللحم او أنا نستفو فالطنجرة او خليتو تقلا مزيان من 2 جهات

من بعد شديت البصلة قطعتها او ضفتها على اللحم

منين كيتشحر البصلة مزيان او كدوب كنضفو المقادير التالية البزار +سكنجبير +القرفة +معلقة كبيرة ديال السمن +الخرقوم +القزبر +التومة معصرة

كنغطيو على اللحم او كنشدو الزعفران شعرة كنديره فلغلقة ديال الكميلة حتى كيسخن مزيان بش كيسهال لينا نحكوه بالكف ديال يدينا او نضيفه فوق اللحم كنخليو اللحم يطيب على خاطرو او كنقصو البوطة

دبا غندزو لتعسل البرقوق غنشدو البرقوق غنديره يتسلق نصف سلقة فالماء او منين يتسلق نصف سلقة غنحيدو هداك الماء الأسود ليطلق

تم كنضفو على البرقوق الماء زهر +معلقة صغيرة ديال القرفة +2 معالق كبار سنيدة +1 معلقة كبيرة ديال الزبدة

كنخليو البرقوق يتعسل او كنشدو اللوز كنخويو عليه الماء طيب او كنقشره او كنقليوه فالزيت

كنشدو الطنجرة او كنخليو اللحم حتى كيوقف مزيان يعني مايكونش فيه بزاف ديال المرقة شوفو كيف ولا او من بعد كنحطوه فطبق التقديم او كنزينه بالبرقوق او اللوز

طريقتي لي كولشي كيحماق عليها فطياب اللحم ديال العراضات

اناقة مغربية