طريقتي بالصور في الحفاظ على الخس والربيع والنعناع طري ولاطول مدة…متفلتوهاش!!!!!!

اليوم حبيت نقتارح عليكم الطريقة لي اكتاشفتها للحفاظ على الربيع والخس والنعناع باش كيبقاو طريييين اطول مدة (اكتاشفتها انا عالم فيزيائي) .
هي طريقة بسيطة ولكن فعالة اول مرة درتها ماتسوقتش ليها حتي ضرباتني الفيقة ولقيت اني درت طايلة وعمري مافكرت نقولها لشي حد حتي قريت هنا في المنتدى ان شي اخت كتسول على الحفاظعلى الربيع وكل واحد شنو كيڭول. شي كيڭول ليها طحنيه مع الزيت البلدية وديريه فقرعة وشي كيڭول قطعيه وديريه فكونجيلاتور وشي كيڭول خليه غير هاكاك وشري القدر لي مايخسرش ليك.المهم تعددت الاسباب والموت واحد. هنا نڭولو تعددت الآراء والنتيجة واحدة وغير مرضية.
بلا منزيد نطول عليكم عندي الشرح بالصور نتمني تنفعكوم طريقتي كيفما نفعاتني وعجباتني.

1)كنغسلو الربيع ولا النعناع ولا الخس 2 مرات .

2)كنديروه يتسقطر شوية فشي شبكة ولا كسكاش ولا غير پلاطو.

3)كنجيبو فوطة نقية او زيف مقطن وكنحطو عليه واحد القدر من الحاجة لي غسلناها(ربيع/نعناع/خس) ونغطيوها بالنصف الثاني ديال الفوطة ونبقاو نضغطو عليها شوية باش الفوطة تشرب الماء.

4)كنديرو الربيع لي نشفناه فبواطة ناشفة ونسدو عليها وندخلوها للثلاجة.

 

 

 

 

وقدما ڭلس عندكم هاد الربيع ولا الخص ميخسرش.

وفي الاخير نتمني نكون خفيفة على قلوبكوم وتقبلو مني هاد الفكرة وخا راها بسيطة.
وأسأل الله لي ولكن الاجر في هذا الشهر المبارك وربي يغفر لنا اخطائنا وهفواتنا ويحقق لينا امانينا.

في أمان الله.

 

 

شكر خاص للأخت ثروتي ديني