طريقتي الخاصة فتعسال البرقوق ..كيجي رائع وبنيييين

السلام عليكم ورحمة الله تعالى وبركاته…. اهلا وسهلا أخواتي

اليوم غنقدم ليكم طريقتي فتعسال البرقوق كيجي ممتاز ولذيييييييييذ
المقادير بالنسبة لكيلو ديال البرقوق.
اولا اختاري البرقوق من النوع الممتاز كيكون كبير وملحم وصحيح .
غسليه عدة مرات بماء دافء تم عمليه فطنجرة واسعة وخوي عليه ماء بارد عادي حتى يتغطى .
عمليه على النار حتى يوصل 2/3 الطياب .
صفيه من داك الماء تم خوي عليه الماء غليان للنصف عمليه على النار وزيدي عليه كاس صغير سنيدة ومعلقة كبيرة قرفة وعود قرفة كبير وحبات من الهيل مفتوحة وخليه يتعسل على نار مهيلة وما تنسايش تكيه بقطيب باش يدخلو التعسال غير بشوية باش ما يترون . زيدي 2 معالق كبار زيت المائدة باش يجي كيلمع.
فالاخير زيدي عليه شوية المسكة حرة مدقوقة ومعلقة كبيرة ماء زهر وخليه يتشرب حتى يولي فيه غير العسل تم طفي عليه .

كيجي لديد وطااااايب ومنسم ومعسل ولي كلاه كيسولني على الطريقة

انا كيعجبني نزينو بالزنجلان مكلي بحال الطريقة الاولى التقليدية .
وكل وحدة تزينو حسب ذوقها ……..
وكاين لي كيستعمل مرق الطاجين فالتعسال . ولكن انا كنفضل هاد الطريقة .
نتمنى تعجبكم وتجربوها .
يمكن ليك تعملي كمية كبيرة وتحتافظي بيها فالتلاجة أيام العيد .