صبنتي الحوايج في ماكينة الصابون وطلقو في بعضياتهم..والكحل طلق ليك في البيض؟؟ هاكي الحل

السلام عليكم ورحمة الله تعالى وبركاته
حبيت نكتب تجربتي ديال اليوم واللي انا فرحانة بنتيجتها100/100
نحكيها ليكم بحال الضحك
لبارح يا لالة في الليل درت حوايجي في ماكينة الصابون
ايوة درت جلابتي جديدة ديال العيد اللي انا فرحانة بيها ودرت حوايج الوان مختلفة ودرت واحد التريكو ديال صوف خفيف لونو اسودهو سبب المشكل
المهم الصباح بغيت نشر الحوايج لقيتهم مزوقين بالكحل نشرتهم ونزلت دخلت لجوجل الله يخليه ليا ودرت سورش
لقيت وصفة لاخت اسمها انجود الله يرحم ليها الوالدين قلت والله حتى نجربها
طلعت للسطح نزلت الحوايج ودخلت الكوزينة وبديت في التجربة
طولت عليكم لكن بغيتكم تكونو معايا خطوة بخطوة
المهم
المكونات الاساسية هي
-مسحوق ماكينة الصابون
-كاسرونة او طنجرة اينوكس
بديت بالحوايج الخفاف
درت كاسرونة فوق النار فيها الماء حتى غلى وضفت عليه مسحوق الغسيل وحطيت فيه قطعة بقطعة من الملابس
والله العظيم الى الكحولة زالت في دقائق والفوطة اللي غليضة وكبيرة درتها في سطل فيه ماء طايب فيه مسحوق والله الى بحال ماكان فيهم والو