زيت الورد لي كنصايبو فالدار مكانش لي ماسولنيش عليه احسن مليون مرة من الجاهز
السلام عليكم حبيباتي كيف الحال ؟
ليوم جبت ليكم موضوع جديد ، كيف تعملو زيت الورد طبيعي بنفسكم الدار
كاين فالسوق انواع كثيرة بالوان مختلفة و روائح مختلفة ، ولكن متأكدين من الجودة ديالو ؟
طريقة اليوم من دورة الجمال مع الاستاذة ذاكرة لله يجازيها كل خير ، هذي ثالث مرة كنقادو و مستحييل نغيرو نبداو على بركة الله
نحتاجو ورد بلدي يابس جهد كاس و نص
نفس الكاس من زيت نوار الشمس
نحطو المكونين فزلافة لمدة ساعة مع الضغط
بعد مرور ساعة ندوزو الزلافة على عافية مهييلة فحمام مريم . هههه يعني سيري قدي شغالك حتى يبالك الورد دبال و لونو تبدل .
بعد ساعة نحيدو من فوق النار الى قرعة زاج مغلقة يبقا فيها 10 ايااام .
بعد 10 ايام نصيفوه فزيف حياتي باش يبقا زيت ورد صافي و بدون اي شوائب
و هااا هو الزيت ديالي واجد و متأكدة من الجودة ديالو
زيت الورد استعمالاتو متعددة حبيباتي :
يمكن ليكم تستعملوه بعد الدوش على الشعر يرطب و خلي ريحة زوينة .
يمكن ليكم تستعملوه للمنطقة الحساسة مرطب و معطر 2 في 1
يمكن ليكم تضيفوه للوصفات الطبيعية خصوصا للبشرات الجافة
انيقة فاسية