رمضان ما بقاليه والو..ملي تبغي توجدي الشباكية تفكريني بهذه..غتجيك متولة وقياس واحد وكلشي نقي بلا متروني يدك والكوزينة

سلام حبيباتي راه رمضان مبقاليه والو

واليوم جيت نشارك معاكم واحد الطريقة غزالة لتحضير الشباكية

ملي تبغي تبداي توجدي تصايبي الشباكية تهلاي اشري المرشم ديالها و يكون ديال اينوكس

و صغير في الحجم.. باش تجيك متولة و كلها قياس واحد ماشي شي كبير شي صغير..

والعجينة حتى هي تكون مقادة في السمك لانك غادية تستعملي الماكينة ديال التوراق

و احسن ماركة لي باغية تشريها ampia..

هذه من جهة و من جهة اخرى تهلاي في الزنجلان لي غادية تدردري على الوجه من بعد التعسال.

غادية تاخدي قريعة ديال المربى متوسطة في الحجم يعني على قد القبطة ديال الكف.

و تاخدي الغلاقة ديالها و تقبيها بواسطة مسمار و مطرقة حتى ترديها شبكة.

و عمري القريعة بالزنجلان محمر و منقي و سديها.

و هي باش دردري الزنجلان على وجه الشباكية بلا ما توسخي يديداتك و تجيك الرشة متولة.

و كلشي يكون عندك نقي و بلا تشخطين.

لان اليدين كيكونو كيتلسقو بالعسل و كيلسق فيهم الزنجلان.

نتمنى تطبقوها وبالصحة والراحة