رضوى الشربيني تنفي شائعة زواجها من زوج الاعلامية منى الشاذلي

تلاحق شائعات الزواج الإعلامية المصرية رضوى الشربيني باستمرار، أما أخر هذه الشائعات فهو ما تداولته بعض المواقع الإخبارية والحسابات على مواقع التواصل الاجتماعي عن خبر زواج الإعلامية رضوى الشربيني من زوج الإعلامية المصرية منى الشاذلي.

و للرد على الأخبار الرائجة،نشرت الشربيني، فيديو عبر صفحتها الشخصية بموقع التواصل الاجتماعي “فيسبوك”، قالت فيه: “الحقيقة إن أنا داخلة في السنة الخامسة من برنامج هي وبس وبيطلع عليا إشاعات كتير مرة اتجوزت 13 و14 مرة، ومرة من فلان وعلان، وبقالي 5 سنين بسمع كلام مش محترم ومش مظبوط، وكل أسبوع أو كل شهر بيطلع عليه إشاعات، وكل الحاجات اللى مرت بيها ساكتة خالص، مهما حصل، وما كنتش بتكلم لأن ربنا موجود وهيبين الحقائق، واللى عايز يحبني أو يعرف عني حاجة كويسة هو حر”.

وأضافت: “لكن النهارده طلعت من حلقة يوم السبت لاقيت إشاعة غريبة، ولأنها ما تخصنيش أنا لوحدي طالعة أتكلم، وده للمرة الثانية، وفى المرة الأولي طلع عليا إني مرتبطة بمواطن مغربي اسما وقولا، واتقال إني هتجوزه، ودلوقتى لسه طالعة من الاستديو بنفس المكياج طلعت إشاعة غريبة، مش عارفة اتقال ليه، أو يمكن عارفة اتقال ليه في التوقيت ده بالذات”.

واتممت قائلة: “وبقول للناس اللى بتحبني وما بتحبنيش أنا شخص مش مرتبط، ولما هرتبط كل الناس هتعرف، علشان أنا مش الست اللى بتعمل حاجة في الدرا ومش الست اللى بتعمل حاجة في الخفا، أنا بجحة كفاية أوي إن أي حاجة اعملها اطلع أقول اني بعملها، لأن الجواز مش عيب وبقول كده في برنامجي على طول اتجوزوا بس اختاروا صح”.

وأكدت المتحدثة ذاتها أنها ليست مرتبطة قائلة: “أنا واحدة مش مرتبطة يا جماعة، اتنين لما يبقى في شخص أو مواطن مش محترم يطلع عليه إشاعة مش محترمة، لو أنت ما بتحبنيش طلع إشاعة بس ما تضرش عيلة ملهاش أي ذنب، ما تضرش راجل محترم أو ست محترم ملهمش أي ذنب غير أن الناس دي أخواتي فعلاً”.. في ست تقبل إنها تتجوز راحل متجوز هي حرة، لكن أنا ما بقبلش ومش عايزه، فبقول للأستاذ فلان الفلاني دي جات فاول منك OUT لأن كل الناس تعرف من هي رضوى الشربيني اللي بتقول لكل واحدة ست حرام عليكى تكسري قلب ست متجوزة”.

وأوضحت: “أنا رديت النهارده علشان الإشاعة المرة دي ما تخصنيش لوحدى، لكن تخص عيلتي التانية، وناس ليها أفضال عليا من ساسى لراسى، وطلعت أديلهم حقهم، وأقولهم حقكوا عليا أنا، وأنا بعتذرلهم حقيقي بالنيابة عن هذا الشخص الغير محترم وحقكوا على راسى”.

واختتمت حديثها قائلة: “أنا ست مش مرتبطة، بربي بناتي وبشوف شغلي وبشوف مشاكل الستات، واللى بنقدر نحله بنحله، واللى مش بنقدر عليه بندعي ربنا أنه يحله، ولما ارتبط مش مصر هتعرف الوطن العربي كله هيعرف، ومش هتكلم تاني اكتر من كده علشان ما اديش الحاجة اكبر من حجمها.. لو رضوي الشربيني بتحب هتقول وهاخد رأيكوا زي ما خدتوا رأيي، زي ما بعمل من 4 أو 5 سنين”.