دخلي شوفي شنو ممكن ديري بالحاجة لي تبانليك كتلاح…نصائح اقتصادية رائعة الجزء 1

السلام عليكم انا ليوم غادي نعطيكم شي نصائح تتفيدني في الدار و تنقتاصد بزاف ديال الحوايج تنتمنى تعجبكم افكاري.

يلا بقات خبزة شايطة تنعمل بيها الفيسة العميا او التردة كتجي غزالة ممكن نعملو شرائح ونعملو في البيض مخلط مع الحليب ونقليه في الزيت كيجي بحال البينيي غزال.

قشور الكروفيت مكنرميهمش كنيبسهم في الفرن وتنطحنهم وكتبقى عندي بنة الحوت فاش مبغيت نستعلها كنكهة
قشور اللوز حتى هما كنيبسهم وكنطحنهم ونعملهم في اي حلوة بغيت نسمها باللوز

الراس ديال الحوت مني كنقي الحوت مكنرميش الريوس ديال الحوت كنعملهم في طنجرة مع 1جزرة وحدة وحدة من الحاجة يعني من الخض شوية الكرافس والربيه حبوب ابزار وتنعملهم يطيبو فوق البوطة حتى يطلق نسمة الحوت مزيان نخليه يبردونعملو في مربعات الثلج وندخلهم المجمد ونبقا نسم بيهم اي حاجة فيها الحوت

الكيس ديال الحمام مني كيصبح غير صالح كنحك بيه اواني الجيكس كيخرجهم كيشعلو

مني كنمشيو للحمام ونغسلو شعرنا بالغاسول الى بقا علينا الغاسول ممكن نستغلوه والنتيجة روعة، تاخدي الغاسول تديره فشوية ديال الماء و من بعد تطلي بيه لافابو ديال الماعن ديال اينوكس كلو و تخليه ليلة كاملة فالصباح غسليه و شوفي النتيجة

بقايا صابون الطاوس ولا الحجرة كنزيد عليهم 2لتر ماء سخون وكنخليه ليلة كاملة فالصباح كنزيد عليه رابعة اومو ونصف طاسة اوني وكيعطيني4 او5 طاسات من عجين صالح لغسيل المواعن

نضيف ملعقة عصير الحامض مع الروز باش يجي بيض، لكل زلافة روز نضيف معلقة من العصير

الى تحرقتلك الطنجرة نديروا الما و الملح فالطنجرة المحروقة 15د و نغسلوها او 2م بيكاربونات الصودا مع الما سخون نخليهم مدة و نغسل.
لازالة رائحة العطرية من الطحانة ندير فيها قطع الخبز المحمص و نطحنوه فيها كيمتص الروائح

نضيف قبصة الملح لبياض البيض ملي نبغيو نطربوه باش كيطلع بزربة

باش تهناي من ريحة البيض استعملي دائما بعض قطرات عصير الحامض مع البيض في اي وصفة كانت سواء حلوى او معجنات او طرطات لان زفورية البيض كاتخصر النكهة

ملي كتبغي تصايبي بسيطلات اصغار ومكتوفريش على المول ديالهم ولهادا استعملي بكية الفرماج مدوبل خاوية ديال لفاش كيرى كتوضعي فيها الوريقات وعاد كتعمريهم وملي تكملي تسدي البسيطلة قلبيها على الوجه الي التحت وبهادا كيجيوا البسيطلات مقادين وبنفس القياس احسن ماكتعمريهم غير هاكاك وكتكري العملية حتى كتسالي

باش الكلمار ما يطرطقش في القلي قطعي الكلمار دوائر و رقديه في الحليب مع رأس ملعقة صغيرة من البيكاربونات الصود و مليحة و ابزار.
ملي تبغي تقليه اسقطريه و ديريه في الدقيق عاد ديريه في زيت ساخن .حتى و حدة ما تهز الرأس .

الا درنا كيك بالشكلاط نغبر المول بعد ما دهناه بالشكلاط غبرة باش منى نقلبها ما يجيش فيها الطحين ابيض وحتى بالنسبة لاى حلوة فيها كوبيل حتى هى نغبر الطابلة فين نطلقها بكوبيل

مين كنديرو كيكة بدانون فالغالب ماكيجيشي المذاق اديالو باين الى ابغيت يغلب مداق دانون فالكيكة خلطي المقادير العادية اديال كيكة ومين اتخلطي بالطحين ضيفي دانون هو الاخير و تشوفي الفرق

باش الكيس ديال الحمام يبقى احرش، الكيس أو الخرقة ديال الحمام دغية دغية كيرطاب و ما كيبقاش يحك مزيان ، كيولي حافي
إيوة إذا بغيتيه يبقى مدة طويلة حرش شوية و كيقضي الغرض بلا ما تشري كل ساعة الجديد ملي ترجعي
من الحمام صبنيه بالتيد إيه التيد و تشوفي كيف يولي ثم شلليه و انشريه ينشف و ردي علي الخبار.

فتات الحلوى لي بقات من بعد العيد ههههه
انا شخصيا كنطحنهم ونخلطهم مع الشكلاط مدوب او نستلي مع اضافة بعض المكسرات ونعملهم في كويغطات الحلوى
او نطحنهم ونعملهم كقاعدة لتشزكيك عوض البسكوي