حرشة جديدة بمذاق غريب ولذييييذ كنتحداك كلشي غيسولك على السر

اليوم جبت ليكم سر من اسراري مكنت بغيت نعطيه لحتى واحد

ولكن انتم اهلي و احبابي شاركتكم بيه

السر ديال هاد الحرشه

و كلشي غيسولك عليها و غريبه و مكاينش اللي غيذوقها و ميقوليكش اش دايرا فيها
+ انها ساهله ماهله ومكتلقاي حتى شي صعوبه لا في طيابها ولا في عجينتها

و الاهم هو المقادير و السر هو الحرشه بالحامض.

غتجيكم عادي و بسيطه و لكن حتى تجربو عاد حكمو..

نبداو كنحتاجو ل:

مقادير الحرشة جديدة بمذاق غريب :
– رابعه دقيق القمح فينو
-رابعه السميده رقيقه
– حامضه محكوكه
-شويه خميره الدار
-1خماره الحلوى
-كاس العنبه مخلط نص زيت و نص زبده مذوبه
-نص كاس سنيده
-نص لتر حليب باش نجمعو العجين و مغنحتاجوهش كامل.

طريقة تحضير الحرشة جديدة بمذاق غريب:

هي كنجمعو المقادير كامله

و حتى كنحصلو على عجينه على هاد الشكل

و الى حسينا بيها نشفات في الوقت اللي كنطيبوها نزيدو الحليب

نخليوها ترتاح

ونبداو الطياب

كنحتاجو للدقيق الفينو باش نفندو فيه و نكرصو بيه

وناخذو كويره وكوروها بين ايدينا و نفندوها في الفينو و نعودو نلولبوها بين ايدينا

ناخذو سركل ديال الحرشه او القالب الدائري اللي خاوي من الوسط بحال اللي في الصوره

و نسخنو المقله و نقصو العافيه على نار مهيله بزاف
انا كندير الحديده ديال الطاجين تحت المقله باش طيب على خاطرها و تجي هشييشه
كنحطو القالب في المقله بحال الصوره و نرشو مكان القالب بالفينو و نحطو الكوره ديال العجين وسط القالب و نكرصوها
حتى تاخد شكل القالب و منرقوهاش بزااااف تبقا شويه غليضه

و ردو بالكم متخليوش فيها الصباع مصورين في العجينه حيت كيجي منظرها خايب و مكطيبش كامله مزيان

و انا عندي حل اخر اللي معندوش القالب ها شنو يدير

يجيب اي غطا او غلاقه ديال شي قرعه او حك في القياس اللي بغيني و ترشيه بالفينو و ديري فيه الكويره تكرصيها في الغلاقه وجيبيها فوق المقله عاد نزليها او قلبيها و بهاد الطريقه ساااااهله و زوينه كتسهل عليك التكراص و مكيجيوش الصباع مصورين في الحرشه و طريقه مزروبه مكتشدش اليد اكتر من القالب و كتجي مقاده حتى من الحواشي اي من الجناب انا استغنيت على القالب و رجعت كنستعمل غير هاد الطريقه

المهم ملي نكملو.

و نخليوها حتى طيب و تشد في راسها من تحت عاد نحركوها و نقلبوها باش متهرش
و اللي زوين في هاد الحرشه انها مكتفرتتش.

وها هي وجدات..
بالصحة و الراحة.