صابونة البابونج لتصفية وتبييض البشرة

سلام حبوباتي كيف راكم لباس ؟؟ نتمنا كل أمورة فيكم تكون على خير وبخيييير

اليوم جيت نشارك معاكم واحد لالة مولاتي صابونة غزاااالة صفاتلي وجهي والله مكنكدب عليكم

المهم حبيباتي بلا منطول عليكم كل لي غادي تحتاجوه أو ديروه هو :

قبل أي شيئ غادي تشدي حفنة ديال البابونج وتغليها فواحد نصف أو ربع لتر ديال الماء وتخليهم يطبخو مزيان ومن بعد طفي عليه وتخليه يبات ليلة كاملة حتى يطلق فيه مزيان، ومن بعد غاذي تاخدو صابونة طبيعية بحال صابونة ديال الطوس وتبشروها وديروها فكسرولة وتسخنو الماء حتى يغلى وديروها فوقها فوق نار متوسطة وتزيدي عليها ربع كأس ديال ماء الزهر وربع كأس ديال ماء الورد ، 2 ملاعق كبيرة ديال الروز المطحون ، 2 ملاعق كبيرة ديال النشا ، ملعقة كبيرة كركم وتزيدي نصف كأس ديال ماء البابونج المصفى ولي وجدتيه قبل بليلة ، وتزيدي عليه ملعقة ولا 2 ديال زيت الزيتون وملعقة صغيرة ديال زيت اللوز الحلو وملعقة صغيرة ديال زيت الورد وملعقة صغيرة غليسرين وملعقة عسل و يلا عندك زيت الفيتامين e زيدي منه كبسولة أو نقط منه، وهادشي كامل خلطيهم فوق حمام مريم مزيااان حتى يذوب الصابون ويتجانسو المكونات مع بعضياتهم وتشدي الخليط وتصبيه فشي قوالب تكوني مفرشة فيهم بلاستيك غذائي ودخليهم للمجمد حتى لمدة ليلة كاملة .

ومن بعد غسلي وجهك بالصابونة وخليها فوجهك لمدة دقيقة  أو دقيقتين أو حتى تنشف وغسلي وجهك بالماء باش البشرة ديالك تستافد أكثر من العناصر المرطبة وتنقي وتصفيلك وجهك .

إوا بصحتكم عزيزاتي ومغنغبرش عليكم ونبقا ديما نشارك معاكم وصفات لي كنجرب شخصيا وكنلقا عليهم مفعول .

مع تحيات مولات الوصفات المجربة …