طورطة باردة  القاعدة بكيكة الكوكوت وغيرت التزيين كتجي لذييذة ومنعشة:
القاعدة درت كيكة الكوكوت قسمتها من الوسط على
جوج.

كيكة الكوكوت :
4 البيضات،200غ سنيدة(كاس عنبة وربع )،260غ دقيق(2 كيسان عنبة عامرين)،قبصة ملح،3 اكياس خميرة الحلوة(ملعقة كبيرة عامرة)،فاني،3 ملاعق شكلاط غبرة،نصف كاس عنبة زيت،كاس عنبة ماء دافئ مدوب فيه ملعقة كبيرة قهوة سريعة الدوبان،ملعقة كبيرة خل.

الطريقة:كنطربو البيض والسنيدة والفاني بالطراب طلع شوية ونزيدو الزيت وحنا كنطربو من بعد نخلطو الدقيق والخميرة والشكلاط غبرة ونغربلوهم ونضيفوهم على الخليط وحنا كنحركو حتى نكملو من بعد نضيفو القهوة لي دوبنا فالماء وحنا كنطربو حتى نحصلو على خليط متجانس وخفيف،ندهنو الكوكوت بالزبدة والدقيق وكبو فيها الخليط ونسدوها بلا مانديرو الصفارة ونحطوها فوق النار مهيلة حتى طيب او ديرو الكوكت فوق مقلة فيها ماء مغلي على طريقة حمام مريم ،ملي يخرج من بلاصط الصفرة بخار ابيض نطلو عليها ونختابروها واش طابت بعود الى خاصها الطياب نسدو عليها ونرجعوها حتى تكمل طياب .عجباتني هاد الكيكة حيت كتجي مسرحة من الفوق باش لي بغا يعمرها كتكون زوينة وساهلة فالتزيين.

الكريمة :

200 ملل قشدة طرية مطربة،10 حبات بسكوي،نصف لتر حليب،فلان ،ملعقة كبيرة قهوة مدوبة فملعقة ماء،انا ضفت ليها 2ملاعق كبار نستلي كاراميل (اختياري).
نطربو القشدة ونخليوها جانبا،نغليو الحليب ونضيفو ليه الفلان ونحركو شوية ،فمولينكس نهرسو البسكوي ونضيفو القهوة ونكبو عليهم الفلان ونطحنو مزياان ونخليوه شوية تنقص الحرارة ديالو ونضيفو القشدة مطربة ونخلطو مزيان من قبل نكونو درنا الكيك فمول لي كيتحل من الجوانب ونسقيوها بشوية الحليب مدوبة فيه القهوة ومباشرة نكبو فوقو الخليط لي وجدنا حيت دغيا كيجمد غير نطحنوه ونكبوه بسرعة ونخليوه يبرد مزيان فالمطبخ عاد نغطيوه وندخلوه للثلاجة تبرد مزيان عاد نزينوها،
انا زينتها بالكاناش وفالجناب درت القشدة الطرية مطربة مع الشكلاط غبرة والشكلاط دايب ودرتها على شكل ورود وفوقها كرات الشكلاطة.
والتانية كبيت عليها الكاناش وزينت بكرات الشكلاطة وخطوط من الشكلاط الاسود والشكلاط ابيض فالوسط.