ترطيبة طبيعية و رخيصة جدا لفرد للشعر المجعد…عن تجربة

السلام عليكم ورحمه الله و بركاته
كيدايرين لاباس عليكم
هاد الوصفه قريتها فواحد المنتدى و استغربت في الاول وقلت مافيها باس نجرب مع اختكم حتى هيا من ذوات الشعر الحرش الله يهنينا منو, الترطيبه خرجات عليا بزاف و شعري كله تهرسلي من قدام
المهم جربت الوصفه و الحمد لله لقيت تحسن من اول مرة يعني مع المده اكيد الشعر كيرطاب ومن غير اي ضرر على الشعر .

1_كاس زيت بلديه
2_مقدار من الصابون البلدي حسب طول الشعر

كناخدو الصابون البلدي و نديروه في مقلاة و لا كاسرونه و نضيفوله نصف كاس ديال الزيت و نحركه على نار هادئه حتى يشرب الصابون الزيت كامله و عاد نزيده بقيه الزيت مع التحريك و كنحصله على كريم مثل كريمات التمليس الي كاتباع
كنخليو الكريم يبرد و كندهنوه للشعر خصله خصله و كنجبدو الشعر بحال كيما كنديره الترطيبه ثم كنجمعوا الشعر و نديره بلاستيكه او بوني و نخليوه 3 ساعات او اكثر و نغسلوه عادي بالشمبوان
و ان شاء الله مرة على مرة الشعر كيرطاب بوحده بطريقه طبيعيه راكم عارفين الصابون البلدي مافيه حتى ضرر حيت اصله من الزيتون و زيت الزيتون غنيه عن التعريف و هاد الوصفه الا ما نفعت ماغاديش تضر اكيد
جربوا وردوا عليا الخبار و شي دعيوات ديال الخير عافاكم