بلا متقطعي القزبور و المعدنوس وتخبعيه فالفريكو..استعمليهم طريين ويبقاو مدة طويلة بلا ميخسرو..أجي نوريك كيفاش

السلام عليكم حبيباتي

انا شخصيا ماكنحملش هديك الطريقة لي كيديرو بعض الناس اللي هي تيغسلوه ويقطعوه و يديروه فالفريكو

كيجيني الله يعطينا براكتو كيولي لا ريحة و لا طعم

غير ماكيزيد فيه اللون وكيوسخ الورقة صافي

انا بعدا كنحرص دائما و ما أمكن نطيب بيه و هو طري

غتقولو لي كيفاش كيصبر ليك و هو معروف عليه دغيا كيخسر

الحل بسيط و هو :

منين تمشي للمارشي حاولي تعزلي شي قبطة ناشفة حيت الما كيخسرو

نقيه بطبيعة الحال و عزلي القزبر بوحدو و المعدنوس بوحدو

حيت إلا خلتيهم مخلطين كيخسرو بعضياتهم

وكل واحد ديريه فميكة جديدة ديال التلاجة

و كل مرة حتاجيتي ليهم خدي الكمية لي محتاجة ليها و الباقي قلبي الميكة عاد ديريها فيه

حيت هو يلا بقا فالميكة مدة طويلة كيطلق الما

بهاد الطريقة كنحافض عليه مدة قد تصل إلى أكثر من 10 أيام دون أن يفقد رائحتة أو طعمه

اوا كيف جاتكم طريقتي