انا كنحمااق على جبن فيلاديلفيا وملي طحت على هاد الطريقة مبقااش كيخطاني كيجي رووعة

فكرة الأخت: أم سهيل و حفصة من أناقة مغربية جزاها الله كل خير

السلام عليكم ورحمة الله وبركاته
اليوم بغيتكم حبيباتي تشاركوني فرماج الكاس او مايشبه فيلاديليفيا وهو من عند الاخت ناني 73ولكن بنصف

عندنا ليتر ونصف حليب
3 فرماج متلت
30 كرام زبدة شوية ملح عصير نصف حامضة
4 معالق كبار خل

نعملو الحليب يفيض من بعد نطفي النار ونعمل فيه الخل ونحرك ونخليه شي ربع ساعة راه غيولي فيه تكللات بحال الى خسر ليكم الحليبناخدو مولنكس نوجدو فيها الفرماج الملح الزبدة عصير الحامض

رجعوا للحليب ناخدو شبكة نغلفوها بشي منديل لي يصفي لينا الحليب ونخليه شي 10 دقايق

ونحاولو نعصروه وغنحصلوا على جبن نديروه في مولنكس على باقي المقادير

ونطحنوا الكل ولي مطحنش ليها مزيان تحاولو تبللو الخليط بداك الماء لي صفينا منو الجبن ولكن عنداكم تجريوه الى ضفتو حاولو تزيدو بشوية بشوية والمولنكس خدامة بحال الى كتعملو المايونيز وعلى العمومو انا ضفت 4 معالق كبار من داك الماء
وهاهو كيف عامل في مولنكس جامد

ونعملوه في بواطة هاد المقادير تعطينا 400 كرام من بعد ندخلوه للتلاجة حتى يبرد

هاهو عملتو في بواطة قصيرة وقلبتها

الى بغيتو تحصلوا على 800 كرام ضوبلو المقادير
ايوا شوفو بحال كتشريو 200 ولا 250 كرام ديال فيلاديليفيا
هنايا غتحصلوا على 400 كرام وشي حاجة لي مصنوعة في ديوركم وبايديكم بلا مواد حافظة
لا تنسوني من الدعاء
اللهم قنا عذابك يوم تبعث عبادك