اليوم غادي نوريكم برنامجي الخاص في ترتيب خضر الاسبوع واللحوم باش نوفر عليا الجهد والوقت :برنامج خاص للموظفات لي معندهم وقت

السلام عليكم حبيباتي
اليوم غادي نوريكم طريقتي في ترتيب الخضر ديال الاسبوع بحالاش كانقادهم ونوجدهم باش يجوني ساهلين وحتى الى بغيت ندير غير سندويتش نشد من كل حاجة شوية بكل سهولة.نتمنى نفيدكم
تبعو معايا (ودائما مرحبا بتدخلاتكم ونصايحكم ).

الدجاج:
جاني الدجاج وقاديتو
2قطعتهم صغاار وحدة قسمتها على نصف ،وعطرتو غير بعطرية الدجاج ودخلتو للبلاستيكات والى المجمد.

هذه الفلفلة الحارة كانغسلها نقطع ليها لعويد ونشفها وندير فيها واحد الثقيبة صغيرة ونقليها فالزيت ونحطها على بابيي كويزين حتى يتشرب الزيت ونديرها فشي بواطة كاتتسد وندخلها لثلاجة تحت فاش نقلي الحوت ولا ندير شي طاجين مانحتاجش نطيبها من جديد غير نقدمها وبالصحة والراحة وحتى الى بغى شي حد سندويتشة حارة الفلفلة واجدة.

هذا الخيزو كانسلقو بالما والملحة وشويش سنيدة غير طريطقة ونصفي منو الماء ونخليه حتى يبرد الى بغيت نستعملو في نفس الاسبوع كانخليه فالثلاجة تحت بغيتو لمن بعد كانديرو في بلاستيكة والى المجمد
كانديرو فالطاجين فالروز فالعصير.

والى بغيتيو لشلاضة كانخرجو من قبل ونقطعو اصغر من هذ الحجم وكاين فاش نجيب بزااف كانقطع على حساب الشلاضة وعلى حساب الطاجين وعلى حساب الكسكس.

هنا لبطاطا مسلوقة بالماء والملحة على حساب الشلاضة ولا امليت
كانسلقها نصفيها نرجعها على النار حتى ينشف منها الما نخليها تبرد نديرها في طاسة سيراميك ولا زاج نغطيها بالسولوفان والى الثلاجة ماشي المجمد

والدنجال كانقطعو كبير شوية نديرو فالبيض مع العطرية من بعد فالخبز الكارم ونقليه وندخلو لثلاجة ولا المجمد فاش نخرجو نسخنو فالفران ولا في مقلة تيفال بدون زيت ويرجع بحال الى يلاه قليتيه وناشف من الزيت فالداخل ديالو وجنبهم هذيك الفلفلة اللي وريتكم قبل.

طريقة الدنجال مقلي بالبيض والشبلير ويجي ناشف

نغسل الدنجال ونشفو ونوجد كل شي عاد نقطعو

الخبز كارم ومطحون البيض الملحة وشوية بزار وخرقوم وكامون انا درت تخليطة ديال العطرية عندي كانقادها بنفسي.

كانهرس البيض نخلط العطرية والملحة ونزيد قياس 2 معالق كبار ماء

نخلط مزيان

ندوز الدنجال فيه

من الجيهتين

ندوزو فالخبز الكارم

هنا كملتو كامل

نسخن الزيت مزياان ونقليه

نحطو على البابيي كويزين يشرب منو الزيت

هنا شوفو من الداخل نااشف وطايب ماتشبعيش منو

بالصحة والراحة.

هنا كانقطع لخيار بعد مانغسلو ونشفو ونخلي فيه شوية دالقشرة ديالو ونديرو فشي حاجة ماشي بلاستيكية ونغطيه بالسولوفان بسرعة مانخليش الهوا يدخلو ونفس الشي لماطيشة نحيد لها الزريعة ونخلي قشرتها فيها وفاش نحتاجهم كانجبد قياسي ونرج الباقي الى بغيتهم دوائر بغيتهم حجم اصغر نقطعهم بسرعة وكايبقاو اسبوع فالثلاجة مزيانين.