العلاج الطبيعي لي هناني من الامساك…عصير راائع خصوصا للحوامل
الوصفة مقدمة من احدى الاخوات من منتدى اناقة مغربية
كيف باين في العنوان اليوم جبت ليكم عصير زوين من تجربتي الشخصية
من صغري و انا كانعاني من الامساك لحد الان واخا كناكل ماكلة صحية خضر فواكه شرب الماء اكل غني بالالياف و ولو
خصوصا مع الحمل عاد مازاد خصوصا في اواخر الشهر الثامن و بداية الشهر التاسع كندخل التواليت اعزكم الله تقول غادي نولد
الحمد لله على كل حال
المهم خذيت البرقوق مجفف قياس 15 حبة غسلتها مزياااااااااان درتها في كاسرونة مع ملعقة صغيرة نافع و الماء لي يغطي لي البرقوق تغطي كاسرونة و تخليها تغلى ثم تطفي البوطة
تخلي البرقوق حتى يبرد مزيان و يطلق مع النافع تحيدي ليه العظم و تطحنيه مع لتر ماء و السكر حسب الذوق و الماء لي تغلى فيه كذلك و تشربي منو
ايلا شربتي منو و تمشيتي كتكون النتيجة سريعة بالمقارنة مع غير ايلا شربتيه و جلستي كتاخد شي ساعات
هادي تجربتي كنتمنى تفيدكم اخواتي.