العراضة لي درت لصحاباتي دخلوا وقولوا ليا كيف جاكم هادشي

كنقدم ليك يا لالة عراضتي لي درت لصحاباتي و جراتي طبعا العراضة وجدت ليها قبل أسبوع تقريبا

عملت الحليوة والشوكولا غلفتهم مزيان واحتفضت بيهم
المالح عملت بلميي مالح وشنيك صغير وبيتزا مربعة بالعجين المورق طيبتهم وخليتهم فالمجمد
أما الكريب معمر بالكفتة والشعرية الصينية وجدتو وخليتو فالمجمد ونهار لي احتجتو عاد قليتو باش كيبقى مقرمش
قبل يوم من العراضة وجدت الجابادور لي غادي نلبس هو فلضة وشوميز بلديين خفافين ما كيعيقوش الحركة ديتهم يتحددو فالمصبنة ووجدت لكسسوار لي غادي نلبس معاهم
وطبعا عملت بروشي لشعري حيت نهار العراضة معنديش الوقت نهائيا
منبعد وجدت الكيسان لي غادي نحتاج للعصير والمونادا وأتاي والماء وكيسان الديسير
الفورشيطات والمعيلقات السربطات ديال الكاغيط لويتهم كيف واضح ووجدت المناديل المبللة والمعطرة
الحلوة عملتها فالطباسل والشوكولا والفقاص المهم وجدت كلشي على بكري باش يبقى ليا الوقت للطبخ والمويعنات
فالليل طيبت الخضرة د السلطة قشرتها وقطعتها وحيدت عليا المويعنات ديالها
يوم العراضة كملت على السلطة ووجدت الباييلا
قبل ما جاو الضياف كنت لابسة ومكملة كلشي
قدمت فالأول السلطة وبعدها الباييلا مع مونادا
والديسير لي وجدوه أسامة وإيمان فلان مع سلطة الفواكه
ومنبعد طارطة مثلجة
منبعد بوقت قدمت أتاي والباقي لي فالصور
الضياف جابو معاهم بزاف ديال الشهيوات لي للأسف مكنش عندي الوقت نصورهم

شوفو الصور وردوا عليا لخبار

عراضتي لصحاباتي و جراتي بالصور

عراضتي لصحاباتي و جراتي بالصور
مقادير السلطة :

فالحقيقة أنا كنعمل عيني ميزاني وغادي نقول ليكم ان شاء لله كل حاجة شنو كنعمل معها

سلطة المكرونة :

المكرونة ملونة مصلوقة ضفت عليها علبة ديال التون ومليحة والمايونيز وشوية د الذرة وشوية د فلفل أحمر مشوي ومقطع صغير

سلطة الباربة :

باربة مصلوقة ومحكوكة فالحكاكة الغليضة
قطعت معها شوية د المعدنوس رقيق ومليحة وم ص سكر وشوية د الزيت وشوية د الخل

سلطة الفلفل :

الفلفل أخضر وأحمر وأصفر مشوي ومقشر ودائما كيكون الأخضر أكثر من الألوان لخرين كنضيف عليها 1 مطيشة مقطعة مكعبات وبصلة مشلضة وزيت بلدية وشوية د الخل وملح و إبزار

سلطة الجزر :

جزر مصلوق مقطع كنشحر بصلة صغيرة وشوية المعدنوس مع الزيت بلدية والخل وشوية د صويا صوص إدا مكنتش مكنعملهاش وشوية د ليبزار والملح كيتشحرو غير شوية ونخلطهم مع السلطة ونخليها تبرد مزيان

سلطة البطاطس :

البطاطا مسلوقة والبيض مسلوق مقطعين+ شوية د المعدنوس مقطع رقيق مايونيز والتون ممكن تضيفي حتى الذرة وطبعا الملح

سلطة الكرنب :

الكرنب مقطع رقيق كنعمل مقلة فيها شوية د الزيت بلدية ونزل عليها الكرنب ونعمل ليه المليحة ونغطيه على نار مهيييييييلة منين يبدى يدبال ضفت عليه م ك د العسل وشوية ليبزار والزبيب وكنخليه يطيب ومرة مرة نحرك وندوق واش هو هداك من الحلاوة لبقى خصو شوية د العسل نضيفها ليه منين يطيب خليتو يبرد

سلطة اللوبيا الخضرا :

اللوبيا مصلوقة زدت عليها مليحة شوية د الزيت والخل ولبزار غير شوية ماشي بزاف

قد يعجبك أيضا

صناعة رف منزلي للأحذية بصندوق بلاستيكي

جولة في منزل راقي بالدار البيضاء

جلسات أرضية مغربية Pouffes جميلة تضفي أناقة على منزلك

سلطة الأناناس :

كنوجدها هي الأخيرة حتى نكون غادي نوجد الطبق قطعت الأناناس على زوج فرغتها وقطعت لي فرغتو منها وقطعت تفاحة كبيرة وخلطت معاهم دانون فاني مكنعملش ليهم السكر غير هكاك ونعمر بيهم الأناناس

سلطة الروز :

روز مصلوق كنغسلو شوية بالما بعد ما يطيب ونخليه يقطر مزيـــــــــان ضفت عليه الكروفيت لي شحرتها فشوية زيت بلدية والكلمار مصلوق وغالبا فالشلايض د الروز كنعمل الرجيلات د الكلمار والجنيحات وكنخلط كلشي مع الملح والمايونيز ويفضل تتوجد السلطة د الروز هي الأولى باش الكلمار والكروفيت كيطلقو ريحتهم مزيان ونراعي دائما الحاجة لي فيها الكروفيت منكترش ليها الملح حيت هو مالح حتى للأخير عاد ندوق لكانت ناقصة الملح نزيد شوية

التزيين والتقديم كيبقى حسب الذوق انا زينت بالبيض مصلوق والكروفيت بقشورو صلقتو شوية فالما والخيار مقطع دوائر