الحداكة و التاويل لربات البيوت و لي خدامة من أحد المنتديات

أنا كنحماق على التاويل و عزيز عليا الدار تكون ديما نقية و أنا نكون 10/10 حيث فأي لحظة يقدر يجي عندك أي واحد خاص كلشي يكون مقاد

بالنسبة للمرا اللي كالسة فالدار:
أول حاجة كيف تفيقي غسلي وجهك بجيل خاص بيه أو صابون، وغسلي سنانك ومشطي شعرك، والنظافة الحميمية ضروري منها، وديري ليكرون ديالك وقلم وشي عكير ولا كلوس وستيك وشي بارفان خفيفة ، وديري معاك واحد جمعة الحمام قبل متخرجي 2×1 ( كاع للي غتحتاجيه من مواد التنظيف يبقا فالحمام )، وسيري فيقي راجلك وعلاما دخل الحمام سيري الكوزينة وجدي الفطور ( ديما يكون فالكونجيلاتور الكرواصون أو كيك … ) باش الفطور ديما يكون حلو ساهل عندك ، وصيبي القهوة أو أتاي أو غير الحليب إلى كان كيبغيه راجلك بوحدو … وفطري معا راجلك وقادي معاه حوايجو وودعيه بابتسامة وبشي دعيوة، وسيري دهني يديك ورجليك مزيان بالزيت البلدية والسنيدة ولبسي الليكات والتقاشر عاد سيري البيت النعاس قاديه، وحللي السرجم يتهوا شويا سدي الباب متحليهش ونتي فالبيت يضربك البرد، وسيري البيت الجلاس طرفيه وشطبيه، عاااااد سيري الكوزينة نصبي ووجدي شليضة وغسلي أي حاجة استخدمتيها ورجعي كل حاجة لبلاصتها وللي نقيتيها فحال الخضرة تكون ميكة تحلي ليها الفم ديالها وتحطيها وسط لافابو ويدار فيها الزبل (أعزكم الله)، ودوري فالدار مسحي الغبرا، التلاجة تكون ديمة نقية، ودوزي تجفيفا على الدار كاملة، وديري دابا ماسك الوجهك وكلسي تفرجي فصباحيات 2m هههههههه أو دخلي النت و الجديد مع موقع مولاة الدار ههههه، فاش يقرب يجي راجلك نوضي غسلي وجهك ودهني ليه إيكرون وتقادي وتعطري ويلا مبغيتيش دبري لرااااسك منقوليكش شنو شاف برا ههههههههههههه يلاه ديري النفس، غير يجي ستقبليه وحطي الغدا، فاش يمشي عاود غسلي الماعن للي استخدمتي وتكاي شويا أو تفرجي أو دخلي النيت ونودي من بعد وجدي شي كيك ولا مسمن … الكوتي، من مور الكوتي وجدي العشا وشي عناية من بعد وبالصحة و بالراحة و ما تنساوش بحال التخمال و الصابون و العجين ديروهم فوسط الاسبوع خليو السبت و الاحد راحة ليكم باش تگلسو مع ازواجكم و تعطيوهم وقت

بالنسبة لي خدامة:
اللي خدامة أول حاجة كيف تفيقي غسلي وجهك بجيل خاص بيه أو صابون، وغسلي سنانك ومشطي شعرك، والنظافة الحميمية ضروري منها، وديري ليكرون ديالك وقلم وشي عكير ولا كلوس وستيك وشي بارفان، وديري معاك واحد جمعة الحمام قبل متخرجي 2×1 ( كاع للي غتحتاجيه من مواد التنظيف يبقا فالحمام )، وسيري فيقي راجلك وعلاما دخل الحمام سيري الكوزينة وجدي الفطور ( ديما يكون فالكونجيلاتور الكرواصون أو كيك … ) باش الفطور ديما يكون حلو ساهل عندك ، وصيبي القهوة أو أتاي أو غير الحليب إلى كان كيبغيه راجلك بوحدو، وجبدي الغدا من الكونجيلاتور للي غتكوني مصيباه بالليل أو الويك أند أو أو تفيقي فالفجر و هادي هي احسن حاجة هدشي إلى كنتو كترجعو للدار مع الغدا، وفطري معا راجلك وإيلا كان يقدك الوقت غسلي ماعن الفطور سي نو بقاي تفيقي بكري، أما بيت الجلوس خاصك تكوني مقاداه بالليل فاش بغيتي تنوضي تنعسي، رشي شوية الما وسانيكروا فالدار ودوزي تجفيفا خفيفة ضريفة، وسيري البيتك لبسي حوايج الخدمة وجري معاك الكوفر لي قاديه فوق الناموسية، وبيجامتك كيف تحيديها طويها وبيجامت راجلك هكداك، وخرجو لخدمتكم، فاش غتجيو مع الغدا كيف غتحلو الباب غتعطيكم ريحة السنيكروا ريحة النقاوة غتعجبي راجلك فهذ اللحظة ههه وحتى فالليل، فاش تجي فالعشية بدلي حويجك وسيري وجدي الكوتي غادي ينفعوك ( الكرواصون أو كيك … إيلا كانو ديما فالكونجيلاتور )، ونتي كتوجدي نصبي حداك وديري لي باط يتسلقو للعشا أو أي حاجة خفيفة، وكلسي ديري الكوتي ورتاحي مع راسك شوية وجمعي الطبلة والوقفة ههه، وسيري شوفي داكشي فين وصل، وصوبي حداك لاسوص لي باط أو شي سلطة بحال الشرمولة أو زعلوك أو … باش يكون مرافق الغدا ومن الأحسن السلطات يتصوبو بالزايد فالويك أند ويدار حساب للي يخصكم فالنهار فكل طويسة، وغسلي أي حاجة استخدمتيها ورجعيها لبلاصتها وللي نقيتيها فحال الخضرة تكون ميكة تحلي ليها الفم ديالها وتحط وسط لافابو ويدار فيها الزبل (أعزكم الله)، وحطي العشا وتعشاي مع راجلك العزيز، وغسلي للي تعشيتو فيه، وقادي بيت الجلاس، ودخلي الحمام مسحي وجهك بديماكيون، وغسليه بصابون أو جيل خاص فيه وديري شي عناية من عندك وغسلي السنينات وفاش تمشي لبلاصتك دهني كريم لإيديك ورجليك وتكاي هدري مع راجلك شويا ونعسي في راحة الله. نهار الجمعة فالليل صبني اللي خاصو يتصبن و السبت صلحي اللي خاصو يتصلح، وقادي الدار مزيان حكي الحمامات مسحي الغبرا بدلي الكوفر لي كل سيمانة يتبدل وسيري الحمام بالليل والأحد فالصباح سيري الكوافورة ويبقا ليك الأحد خرجي نتي وراجلك أو سيرو صلو الرحم أو …