البغرير بالقمح الكامل ناجح و عمرو ميحشمك لذيذ و سريع فالتوجاد غينسيك فالبغرير ديال السميدة
اليوم جبت ليكم طريقتي فتحضير البغرير بالقمح الكامل كايجي غزال و لذيذ و سريع فالتوجاد غينسيك فالبغرير ديال السميدة.
نبداو بالمقادير..
المقادير
زلافة و نصف دقيق القمح الكامل
2كيسان ماء دافي
معلقة كبيرة سنيدة
شوية ملح
2 خمارات حمر
طريقة التحضير
ساهلة و كولشي يعرفها:نديرو الما فمولينكس و نزيدو عليه الملح سنيدة و الدقيق و نخلطوهم مزياااان حتى نشوفو الرغوة طلعت من الفوق
من بعد نضيفو الخميرة و نضربو مزيان عاوتاني شي 2 دقايق
و فهاد الأثناء نكونو حطينا المقلة تسخن و نبداو نطيبو البغرير ديالنا مباااشرة
ملاحظة:
فكل مرة نبغي نطيب بغريرة نشلل المقلة بالماء بارد
شوفو تبارك الله كيف متقب كلو و كايشهي ههههه
و كانقدمو مدهون بزبيدة بلدية و عسيلة أو زويتة بلدية يا سلااام شهوة منو…
و بالصحة و الراحة.