اسرار غريبة وعجيبة من مطبخي غادي تنفعكم اكييد

حبيباتي جمعنا لكم في هدا المقال مجموعة من اسرار الطبخ العجيبة للمبتدئات جربوها اكيد غادي تنفعكم

-باش مريقتك تجي لذيذة وتاكلي عليها صبيعاتك وطيبيها فاش ماكان يا طاجين يا طنجرة ياكوكوت قطعي البصلة رقيقة زيدي عليها ملح ولخرقوم وزيت خليها تتقلى مزيآآآن عاد زيدي لقسم الله لحم او دجاج وخليهم يتقلو حتى تدبل لبصلة ويتغير لونها و يبدا يطرطق زيت عاد زيدي عطرية وتومة وربيع وزيدي لما مباشرة خليها تغلى ورمي خضيرتك وتلدي بالرويحة وبالصحة والعافية
– البيشاميل باش يجي بنين من غير الملح و الابزار و الجوزة حكو عليه شوية ضامة البنة بكري
-سر اخر من تحرق ليك الطياب بلا ماتحتاجي سلك الحرش او تخسري معناتك غادي تاخدي خمارت الحلوة او الماء او ديرها على عافية مهيلة غادي يتحيد ليك انشاء الله كلاشي بلا تمارا
-من تصلقي البطاطة زيدي معاها شوية تاع الخل باش متفركعش ليك او تفتت
باش مايلصقش ليك الحليب من تبغي تفيضيه كادوزي شوية تاع الماء بارد في الكاسرونة
-من تكوني غادا تشري المعنات ديما يكون عندك طريف تاع المغنطيس في بزطامك باش تشوفي الماعن واش تاع اينوكس ولا مغشوش فيه الحديد
– سر طيابي فتكتوتة سواء فلفلة و لا دنجال كنقطعهوم و كنقليهوم مع زيت و الملح و كنخليهوم يتقلاو مزيان عاد كنزيد شرمولة و التوابل و فالاخير قطرات زيت زيتون
-اما بنسبة لطواجن لحم او دجاج كنقلي اللحم و التوابل و الربيع و الزيت حتى كيتعلك مزيان و البصلة عاد كنستف خضيرتيو نروي بكاس صغير ماطايب كيجي طاجين واقف
-الا كنت باغا تومه نقشرها كنحطها في ما دغيا كتحيد القشره ديالها
-ملي نبغي نغسل دجاج كنحط معاه دقيق كيجي بيض وزفريه كتحيد
-الا بغيتي للحم دغيا يطيب كنظيف عليه خماره الحلوه
-الا بغيتي ماعن يخرجو يشعلو كتخلطي صابون البلدي مع الخميره
-بغيتي عصيرات متاكسدش بحال لافوكا او الموز و التفاح ملي كتعصيرهم كتحطي طريف للحامض ملي تجي تقدميه حيديه و عندك تنسايه
-اما بالنسبة للوبيا و الحمص الى كانو مطيابينش و راسهوم قاصح كنرقدهوم ليلة كاملة فالماطايب و جوج معالق كبار صودا كيوليو زبدة فالطياب
-هنا تاني لعسل راه رمضان قرب هادو لمقادير ديال 2 كلو في لكوكوت نديرو 2 كيلو سنيدة مع نصف لير ماء نخليهم حتى يغلاو ونزيد نص ليتر أخر من بعد نقسم حامضة على 4 ونزيدها ونشد كموسى ندير فيها اتاي بزايد وشوية ديال القرنفل أزير نافع وحبة حلاوة قرفة وعرق ديال خودنجال ونعقدها ونزيدها في لكوكوت تنبقاو نحرك حتى يطيب راه مدة طياب ديالو شي ساعة وتلت تقريبا على نار متوسطة- اما بالنسبة لعصير لافوكا ملي كنطحنها كندير معاها العضم ديالها لحين التقديم و نزولو كيبقى العصير فاللون ديالو
-ملي تبغي تنقي الخرشف دوزي علي ايديك الحامض متشدش الكحليه
– مرات خالي ديما كيجي طيبها بنين منين سولتها قالتلي
كنزيد ديما شوية ديال سمن ف لمرقا عاد كاتسد على ل كوكوت و كتجي لماكلة كاتحمق
– دجاج محمر نطحنو قزبور ومعدنوس توم وحامض مسير شوووووووية ماء عاد نضيفو العطرية المعتادة ونخشيو صبعنا فصدر دجاجة
-الى بغيتي تقبي البيتزا مشطة تكون جديدة
– هادي طريقة طياب شفتها عند طباخة لي طيبات فسبوع ولدي كلشي شكرها
– دجاج كيطيب فمريقتو والزيت كضيفو فالاخير
-الحلوة الى تحرقات من التحت ناخدو حكاكة وندوزوها بشكل خفيف
– اللحم في الاخير كنضيف ملعقة كامون وطريف سكر صغير
– عجين المسمن كنعجنو ونديروو فبلاستيكة دغيا كيطلق راسو
– باش تجيك الخبز محمرة ديري شوية سنيدة فالعجين
-بغيتي الهريسه تبقا كيما هي حطي عليها معلقه زيت العود فيما تهزي منها حطي زيت نفسها حك ماطيشه
– الحلوة الى جات قاصحه طيطواره كنديرها فطاسة الحلوى ونلوح معاها ربع ديال الخبز ونسد عليها تلات ايام كترجع زبدة
– بغيتي حلوى اوسلو يبقا مزيان حطوهم في تلاجه ملي تبغيها خودي قياسك ورجعيها
– الكيك باش يجي منفوخ الخل وشوية الخميرة ديال الدار + الحلوى باش متجيش الحلاوة ديالها بزاف نديرو قبصة الملح
-بالنسبة لكيكة مكنطربش بزاف السكر والبيض وحتى نخلط كلشي عاد نضيف الزيت
– الا كنتي مزربة ومشا الحال على نصيب طاجين وكان عندك دجاج قطعيه طرفات صغار وقليه مزيان فشوية زيت حتى يخد لون وفمهراز دري شوي تومة سكين جبير طري والمعدنوس ودقيهم مزيان وزدهم على دجاج ومنين تطفي وهو سخون زيدي شوي تحميرة ونقيطات خل كيجي رااااائع وفاقل من ربع ساعة كتوجد- بغيتي الفريت زوين اواقف تقطعي البطاطا وديري كاسرونه فيها الماء يغلي رمي بطاطا غير تشوفي رغوه ديريها في شبكه وقليها من بعد
– شفت داك انهار شي اخوات مكتجيهمش اللوبيا مزيانة
اللي كلاها عندي كيشكرها انا نقلكم سر ديال طيابها
في الاول فزكيها ليلة كاملة خودي بصلة حكيها فحكاكة غليضة تشحر مع اللوبيا ملعقة سكينجبير مزيان ونديرو عليها الماء مسدو كوكوط حتى طيب مزياااااااان البصلة كدوب
نحلو عليها ونزيدو مطيشة محكوكة فبلاصة صغيرة قزبر معدنوس ملح سكين جبير تحميرة ابزار كمون ملعقة مركز طماطم وفلفلة حارة في الاخير ونوليو نسدو عليها فالكوكوط حتى طيب فعلا كتجي غزاالة
-فكرة اخرى
الى بغيتي مريقة تجيك صافية وغزاالة عواد القزبور والمعدنوس منرميوهومش
ناخدوهم ونغسلوهم نقسمهم عاى جوج ونحزمهم بخيط ديروهم فريكو وقتما جينا نطيبو نجبدوهم ونديروهم ومنين يطيب الرقة نحيدوهم
-الحوت كنستعمل شيت دسنان جديدة دوك رخاص كنفي بها سنسول كنحكوه دغيا كتنقى
بالصحة والراحة
-الا كنتي زربانه على بغرير باش يخمر ملي تطحنيه فمولينيكس مباشرة ديريه فالكوكوط و سدي عليه و ديري الصفارة و خليه على ما تجمعي البوطاجي و توجدي صوينيتك تلقايه خمر دغيا
– الخضار ملي نبغيو نصلقوها باش تجي بنينة نديرو بصلة مقطعة و حزمة الربيع
-سر اخر بالنسبة للعصير كنشري ليمون دالعصير بزاف و نشيتو و نغسلو و نعملو فالكونجيلاتور و ملي نبغيه نجبدو و نديرو فالكوكوط يطيب و نحل عليه و نخليه يبرد عاد نقشرو نرمي القشور و العضام عاد نطحنو مع السكر القياس و شي ضانون كيجي رااائع و كيعطي بزززززاف
-بالنسبة لي لحريرة ملي نبغي نديرها و نكون مزروبة :كنحك بصلة + حمص +عدس+فول + لحيمة أو صدر دجاج و جناوح “على فكرة بالنسبة لتجربتي بالدجاج كتجيني بنينة” +*عطرية +خرقوم+زيت +ملح و ملعقة صغيرة سمن و نقفل عليها 1/2 ساعة
و فهاد الوقت كنوجد القسبر بزايد+المعدنوس مكرضين كنطحنهم في الخلاط الكهربائي مع 4 مطيشات محكوكين بلا زريعة و عاد كنعملهم واحد 10 دقايق للحريرة بلا منقفل الكوكوط و نزيد طماطم الحك 2 ملاعق كبار عاد كندورها بطحين و تكون شوية خفيفة و عاد الشعرية
-بالنسبة للعطرية راني درت عليها *:حنا في المنطقة ديالنا كتكون عندنا عطرية الحريرة موجودة فحك ديالها بوحدها و تكون مكونة من المواد التالية و دائما قبل شهر رمضان الكريم كنوجدوها طرية: مثلا عبر 250g سكين جبير , 250 كروية 1/2 وقية كبابة 100 كمون 100 قرفة 100 خرقوم 100 ابزار كناخدوهم حبوب كيتنقاو وكتشمسو و كيندقو بالمهراز غير خرقوم و سكين جبير و القرفة غير يتهرسو ماشي يندقو مزيان راه يطيحو لكتاف و من بعد نديوهوم لمحل العطار يطحنهم مجموعين و اللي بات تاخدهم من عند العطار مطحونين “لكن جداد” وتخلطهوم بلا مهراز بلا صداع الراس
منقولكمش على مذاق لحريرة بهاد العطرية راها كتشم من راس الدرب