ارز بالحوت والخضر في المقلاة

انا حضرت غدا خفيف رز بسمك فالمقلة كيجي بحال بايلا غزال بزاف
الوصفة
كناخد بصلة متوسطة نقطعها صغيرة وزوج فصوص ثوم مقطعين صغار ونديرهم فمقلة مع شوية زيت زيتون وكنزيد عليه فلفل الوان نص حبة من كل لون نقطعهم صغار،جزر مقطع صغير وجلبان ،نضيفهم للبصلة حتا يشحرو مزيان ويذبلو عاد كنزيدو الحوت لي عندنا نقليوه شوية مع ديك بصلة و فلفلة ثم كنزيد توابل ملعقة صغيرة من كل حاجة
ملحة حسب الذوق، سكنجبير، خرقوم، فلفل اسود، تحميرة،ثوم بودرة ،زعفران، رشة من الزعتر جاف
وملعقة كبيرة قسبر و زوج معالق كبار صوص طماطم المركزة
وكنخلط كلشي ثم نضيف كأس كبيرة ونص من االماء المغلي و زلافة صغيرة رز خضر ديال بسمتي او رز الأصفر كلاصي مهم مديروش رز ديال لحليب لي كيتعجن
كنستفو من كل جهة مكنحركوش بالملعقة نهائيا كندير عليه لغطا وكنخليه يطيب على نار مهيلة باش ميشربش المرقة ويبقا رز مطايبش عطيوه الخاطر غير نص ساعة كيوجد

وبالصحة والراحة.