أول شاب مغربي ينجح في انجاز مقهى متنقل كمشروع خاص ب 20 ألف درهم

بعد 3 أشهر من التخطيط، استطاع الشاب محمد قيلولي أن يخرج مشروع “مقهى متنقل”، إلى الوجود، وبتمويل ذاتي.
وقال محمد، الطالب الجامعي في شعبة القانون باللغة الفرنسية، متحدثا عن مشروعه الذي أطلق عليه اسم “Malyncoff”، “أنا كنت باغي ندير مشروع ديال سناك موبيل، اللي ممكن يخدم فالمناطق اللي ما فيهاش الناس فين ممكن ياكلو، ولكن فاش قلبت لقيت داك الشي التجهيزات ديالو غالية، ومن بعد لقيت بروجي ديال Coffee-Bike”.
وأضاف محمد، ذو 22 سنة، في اتصال هاتفي مع موقع “كيفاش”، “قلبت مزيان على كيفاش ممكن نخدمو وشحال الثمن وواش ممكن نطبقو هنا ولا لا، المهم درت فحال دراسة، ومن بعد قلبت على أقرب نسخة لداك الـbike (الدراجة)، شفت جوج مصنعين ففرنسا ولكن داك الشي كان غالي، من بعد لقيت واحد الإعلان فسيت مغربي، واتصلت بمولاه وهو واحد السيد فالقنيطرة هو اللي صوب ليا الدراجة”.
وبعد تمكنه من صنع الدراجة المثالية لمشروعه، اقتنى محمد آلة طحن القهوة وباقي مستلزمات المشروع.
واسترسل المتحدث: “دابا يالاه كنجيب المصروف ديال الدري اللي خدام معايا، حيث أنا باقي كنكمل قرايتي وخدام على مشاريع أخرى، وهذا بالنسبة ليا إضافة لأنني قدرت نخلق منصب شغل، بجوج دالميلون”.
وأشار الشاب إلى أن رئيس جهة الشرق عبد النبي بعيوي، أعجب بمشروعه وقرر دعمه، قائلا: “رئيس الجهة شاف الفيديو ديالي وعيط عليا وهضر معايا وشرحت ليه المشروع وسولني كيفاش ممكن نطوروه، ووصلنا أنه غادي يعطيوني دعم، ولكن بشرط نأسس تعاونية، وبديت الإجراءات اللازمة ولكن مع أنا غير كاري مع الطلبة لقيت مشكل حيث ما كيتعطاش التوصيل ديال الكراء وهو ضروري في الأوراق المطلوبة، ولحد الآن باقي واحل مع الوراق”.