أفكار لالة مولاتي باش نظمو شغلنا و تكون دارنا ديما نقية و متولة

باش نكونو متولين او نسهلوا شغلنا خصنا

1 _نتعلمو حنا او وليداتنا نردو كل حاجة لبلاصتها او هادي اهم قاعدة

2_كولشي يتعاون مكاينش نتا ولد معليكش…. لا كلشي كيتحمل المسؤولية او كايعاون او كايدير نوبة ديالو ونكلفو كل واحد بمهمة خاصة بيه حتى من الطفل الصغير يقاد الصبابط مثلا” عادي

3_التاويل كيجي شوية بشوية ماشي غدا غنولي متولة كل مرة نحاول نصلح حاجة فداري او حتى فشراء الادوات كل شهر اذا امكن نشري حاجة غنتول بيها داري لمهم شوية بشوية او على قدر الاستطاعة

نبداو دابا فتاويل اهم او اصعب غرفة فالدار الكوزينة وما ادراك من الكوزينة

1)الكوزينة اي المطبخ

_ كلما نغسل الماعن نمسح البوطة ديالي او ضروري بالما ديال البوطة غي قطرة راها كافية

_ من بعد كل وجبة نغسل مباشرة الماعن باش مايتجمعوش عليك او لي دخل او شرب فشي كاس ولا استعمل شي حاجة يغسلها عاد يخرج من الكوزينة كان صغير ولا كبير خصها تولي فينا قاعدة

_ مني كناكلو او نكملو كل واحد كيوصل معاه حاجة لكوزينة او هكدا كنجمعو الطبلة فوقت قياسي

_ دائما نوقفو فالكوزينة او حنا لابسين الطابلية او تكون ديال الميكة راه حشومة تلقى مولاة الدار عامرين حوايجها بالطبايع او حرام كتخرج هي على حويجتها

_احسن حاجة تكون عندك فلكلوزينة هي واحد الخزنة ديال الزاج تحطي فيها كاع الماعن لي عندك زايدين او الماعن ديال الضياف يكونوا مجموعين فيها او يكون عندها الساروت باش مايبقاوش عائلتك يجبدو ليك الماعن او يقويو عليك الربلة او مني يجيو ضيافك تلقاي كلشي فيها متول او واجد ماشي فين مشات لمعلقة المذهبة فين غاندير السكر لا كلشي واجد او قريب غي عمري او حطي

_الاكيد هو ان الماعن ديال الضياف بوحدهوم حيت كيكونو غاليين او منضورين او الماعن لي كنستعملو بوحدهوم حيت كيكونو صحاح و عمليين ولكن ماشي نديرو فراسنا الشوهة كاس كبير كاس صغير القهوة فكاسرولة لا لا… حتى هومة نتولوهوم يكون سربيس بحال بحال و جميل او صحيح او الكيسان ديما نشري 2 مجموعات باش لي تهرس نعوضوبخوه بحالو او نحط الماعن لي كنستعملو قراب لينا او فنفس الجهة ماشي حط هنا او حط لهيه

_ واحد الرف خاص بالالات الكهربائية لي عندك . مستفين او متولين لي كنستعملها كنمسحها ديك الساعة او كنردها بلاصتها او نصيحة فالالات ديما شري الحاجة الغالية باش تبقالك ديما مزيانة او تخليها حتى لوليداتك من بعد . انا كيتعجب فيا مول الحانوت كنقولو فين الغالية فيهوم ماشي حيت عندي لفلوس بزاف” لا ” ولكن باش نرجع نزيد نصبر ونجمع فلوسها او نشري الحاجة المزيانة او كيما كيقولو لا زربة على صلاح

_غطاء الصبانة او الفران او التلاجة باش يبقاو ديما جداد او ميتصداوش او مني يتوسخو نصبنهوم

_علب القطاني مهمين بزاف كيحفضوهوم من الحشرات او كيبانليك اش عندك او شنو خصكي تقداي

 

_السرابت او المناديل كنديرهوم فصاك كيتسد باش مايتلفوش ليا . ديال الضياف بوحدهوم او ديالنا بوحدهوم . ديالنا حاطاهوم فين كناكلو باش كيجيوني قراب

_او هادي الحلفة ديال الماعن احسن مكاين رخيصة او رائعة او مكتجمعش الميكروبات مني كنسالي كنغسلها او كنحطها تنشف بهاد الطريقة لي فالصورة

_بالنسبة للسطل ديال الازبال حشاكوم كنديرلو 2 ديال الميكات وحدة كندوار عليها السكوتش (اللصاق) باش مطيرليش او التانية كنديرها من الفوق وهكدا كيبقالي السطل نقي مني كنبغي نغسلو