وصفة الزنجلان وزريعة الكتان لإيقاف تساقط الشعر وترطيبه

كان عندي واحد الشعر فاقصني مع السبايغ ولميش رجع حالتو ونشف بزاف و ولا كيتكرد واحد صاحبت اختي قالت ليها واحد الوصفة صراحة الله يعطيها الصحة ايوا مع انا معقداني شعكاكتي معكزتش عليها وتقريبا شي شهر باش بديت كنديرها و الله روعة طولت عليكم ……..صافي انا غنقولها ليكم بصح بغيتكم متحرمونيش من شي دعيوات

المكونات
1 كاس جنجلان
1 كاس زريعة الكتان
كاس ونصف زيت العود



الطريقة

تنقي الجنجلان وزريعة الكتان وتحمريهم غير شوية في المقلة تطحنيهم في الطحانة مزيان تاخدي كاسرونة فيها الماء تغلى وخودي كاسرونة اخري ديري فيها الخليط الي طحنتي وزيدي عليه زيت العود (حمام مريم) وخليه يغلي مزيان على عافية مهيلة تقريبا 10 دقايق خليه حتى يبرد وديريه في قرعة الا كان شعرك جاف بزاف بقاي مرة مرة تدهني بالزيت.

والله ريحتو زوينة متخافوش منو وملي تكوني غادا للحمام هزي من الخليط التحت وشقي بيه وخليه في شعرك ممكن تباتي بيه الا ما كتنش عندك موشكيل و ملي تمشي للحمام غسليه مزيان وملي تجي من الحمام دهني بالزيت الي الفوق في القرعة حيت الخليط غيتعزل التحت والزيت الفوق

طولت عليكم كنتمتى نكون شرحت الطريقة مزيان بيني وبينكم والله شعري ولا رطب ومبقاش كيطيح اقسم بالله البنات كنهدر عن تجربة جربوها رخيصة وساهة والنتيجة زوينة بزاااااااااف مغتندموش
متنساونيش من دعيواتكم




قد يعجبك ايضا
اترك تعليقا