ماسك غزال بالحمص والخرقوم للتخفيف من الكلف والبقع في الوجه

البنات مساء النور نتمنى انكم كلكم بالف خير. جبت ليكم ماسك خطيييير للكلف والبقع لي فالوجه عن تجربة ودبا وانا كنكتب حاطاه شفتو في اليوتيوب عند بزاف د البنات ولاني اكبر معكازة فوق الارض ومكنتيقش فداكشي قلت نعل الشيطان هاد المرة ونجرب وفعلا استعملتو لحد الان شي 22 يوم زوين بهات لي الكلف بزاف علما اني من قبل عام واربعة اشهر وانا متبعة مع dermatologue على ود الحبوب واثارهم والكلف تبعت برنامج طبي كامل وفعلا وجهي تنقى من الحبوب واثرهم وبقالي الكلف حلف لمشا والكلف اصعب مشكل ممكن تعاني منو البشرة… المهم بلا منطول وخا دجا طولت هههه نقولكم الماسك
كتاخدو كاس عنبة دقيق الحمص كتزيدو عليه جوج معالق خرقوم عرق بلدي (راه مكيخليش البلدي الصفورية فالوجه ويلا خلاها راه غير ملون ماشي خرقوم عرق) كتزيدو عليهم بيضة بلدية بقشورها وتزيدو ماء ورد تبقاو تخلطو تا تحصلو على عجينة كتسرحوها فوق ورق الطبخ فشي لاطة د الفران وتسخنو الفران مزيان مزيان وتخشيوه اكرم ومليد تحسو بيه قساح جبدوه هرسوه طريفات ورجعوه تاني للفران تا يكرم مزيان جبدوه وطحنوه فمولنكس وغربلوه بشي ليباموس ولا شي صفاية رقيقة بزاف وصافي تجمعوه فشي قرعة وتبقاو تاخدو كمية لي تقدكم وخلطوها بماء الورد وديروه لوجهكم نص ساعة وغسلوه وقبل متحطوه مفيها باس ديرو تقشير بسيط للبشرة بشي كيس د الحمام رطب ولا بالقهوة والزيت د الكوك وغسلو مزيان عاد ديرو الماسك راه البنات زوين بزاف داومو عليه كيزول الكلف

إقرأ أيضا  كيراتين طبيعي من الموز وزيت الزيتون لشعر ناعم

انشري هذا المقال