فراني ديال الغاز عندو 18 عام كل ما يتصدا كنرجعو جديييد

الصدأ فالثلاجة او الماكينة صابون اوتوماتيك او الفران

نصحوني باللون الرمادي فالثلاجة ولاماشين الافي لكن اختاريت الابيض علاش؟؟؟؟؟؟؟

لاماشين عندي 4 سنين هادي دايما جديدة كل مرة كنصباغها بالابيض رشاشة عند الدروكري

بالنسبة للفران ديالك سيري عند الدروكري وجيبي قاعط احرش الزيرو وحكيه مزيان حتى يزول منو الصدأ تماما ومسحيه بالشيفون

بغيتي تصبغيه بالرشاشة راه عند الدروكري 20درهم 25 درهم بالالوان انتي اختاري

وطلعيه للسطاح اوصبغيه ريحتها قاسحة

او تاخدي عند الدروكري دائما حك الصباغة الزيت 1 كيلو فالالوان اختاري

هادي ماشي رشاشة هي غراف وخودي معاه شيتة دالصباغة متوسطة وصبغي فرانك وردي عليا الاخبار

الفرق مابين الرشاشة وغراف الصباغة 1 كيلو هو:

الرشاشة كتنشف فالبلاصة وصباغة الغراف كتبغي يومين حتى ل3ايام

مؤخرا صبغت فران دلكاز عندي اكثر من 18 عام الله يعمر ليه الدار ماركة عفيفي صبغتو كلو بالاسود بالشيتة والدويرات الي فالباب صبغتهم بالكري

والله المنظر واعر مرة مرة كنصبغو حتى انا كنحس بيه جديد وتكوني مرتاحة

هانتي انا لاماشينا لافي كنصبغها بالرشاشة وبالنسبة للثلاجة كدلك غير دابا عندي ثلاجة جديدة ماعندي مشكل

الثلاجة الي كانت قبل منها طبعات بالصدا كنحكها بقاعط احرش رقم 0 ونصبغها بالرشاشة دائما عندي جديدة حتى بعتها اوباقي نقية

اضافة: الى بغيتي ترشي بالرشاشة رشي عند بعد الى قربتيها وانتي كتصبغي كتخلي ليك الدمعة دالصباغة على الفران

راجلي دايما تايقولي انا عندي راجل خاصو غار اللحية

كتعجبني المرا الي يكون فيها الهم تصبغ تعلق رواقات ودك مسامر زوين دبري مسائلك بنفسك ماعادا المسائل الي ضروري ليها المعلم هاديك باينة

اشارة

 

الرشاشة حاولي ماتصبغيش عن قرب رشي عن بعد

راه كتخلي الدمعة الصباغة بحال الى سايلة على الفران بعدي ورشي راه ساهل خاصك غار تزعمي

بالنسبة للثلاجة ولاماشين الى صبغتيهم بحال الى جديدة كيتخباو كاع الخدشات

بشرط الى كان الصدأ حكي بقاعط احرش رقم 0 عاد صبغي باش يزول الصدأ وتبقى الخدمة ناضية ونقية

راه الحك الغراف ديال الصباغة الزيت فيه جميع الالوان الكيلو كيدير 20 درهم حتى 25 درهم