دخلي تقتاصدي ووكلي وليداتك ماكلة صحية..أفكار ذهبيةن

السلام عليكم غادي نعطيكم مجموعة من الوصفات و النصائح باش تقتاصدو وتوكلو ولادكم حاجة صحية.

مطيشة ديال الحك صنع منزلي
بالنسبة للطماطم كناخد مطيشة كنغسلها مزيان و كنقسمها على اربعة و كنديرها بجلودها و زريعتها فالطنجرة و نخليها طيب ومن بعد كنطحنها مزيان فمولينكس و نصفيها فالصفاية الكبيرة و نعاود نرجعها طيب شوية غير باش ينقص شوية الما لي فيها و كنديرها فقراعي معقمين و كنطيب القراعي 10 ديال الدقايق فالكوكوط و ها مطيشة ديال الحك واجدة.



الذرة معلبة صنع منزلي

بالنسبة للذرة كنجيب رابعة ديال الذرة يابسة(لي كنطيبو بيها الكلية) كنبيتها ليلة كاملة فالما و من بعد كنطيبها بالما لي ترقدات فيه فالكوكوط مدة 45 دقيق، كنخليها حتى تبرد مزيان كنصفيها و كنديرها فالبلاستيكة و نديرها فالمجمد 5 ايام، فاليوم السادس كنحيدها من المجمد و كنديرها فقرعة ديال الزاج و كنغطيها بماء مملح و كنديرها فالثلاجة و هاهية الذرة معلبة جاهزة و كمية كبيرة و صحية.
كوفتير اقتصادي و صحي

يلا عندك قرعة صغيرة ديال الكوفتير ديال الفريز و بغيتي تزكيها و تولي عندك قرعة كبيرة منو، كتجيبي نص كيلو ديال الباربا كتغسليها و تقشريها و تحكيها فالحكاكة غليضة و ديريها فالكوكوط وزيدي ليها الما حتى تغطى و خليها طيب 20 دقيقة و زيدي ليها فاني و قشور حامضة محكوكة وعصير حامضة و 2 كيسان العنبة ديال سنيدة و زيدي هاديك القرعة ديال الكوفتير ديال الفريز صغيرة لي عندك و خليها طيب على نار مهيلة حتى ينقص الما بالنص مع التحراك مرة مرة و طحنيها فمولينكس و هاكا غادي تحصلي على قرعة كبيرة ديال الكوفتير بنفس اللون و المذاق ديال كوفتير الفريز و فنفس الوقت صحي حينت الباربا مفيدة لينا و لولوليداتنا.

الطون المعلب صنع منزلي

بالنسبة للحوت معلب كناخد الطون كنديرو يتفور مع الملح وورقة الرند و 2 سودانيات ملي كيتفور كنقيه من الجلد و الشوك و نديرو فقرعة ديال الزاج مع السودانية و فص الثوم و ريقة ديال الرند و كنسخن شوية الزيت و نكبها فو ق منو و نسد القرعة انا كندير زيت العود و كيجي لذيذ و صحي و كنحتافض بيه فالثلاجة.

الخبز بالخميرة البلدية 

النسبة للخميرة بلدية كناخد زلافة كبيرة ديال الدقيق بالنخالة ديالو و كنزيد ليه الما دافي.و كنخلط حتى كتولي عندي عجينة بحال ديال بغرير كنديرو فعلبة ديال الزاج و غير كنحط فوق منها الغطا مكنسدهاش مزيان باش يدخل ليها الهوا و كنديرها فشي بلاكار باش مايدخلش ليها الضو و كنخليها حتى كتنفخ مزيان راه كتاخد مابين يومين حتى 4 ايام على حساب الجو. و ملي كتولي عندنا الخميرة واجدة كنشدوها و نزيدو ليها زلافة اخرى ديال الدقيق و الما دافي حتى تولي بحال بغرير و نغطيوها و نلوييها فمانطا حتى كتخمر مابين ثلاثة حتى 4 ديال السوايع و من بعد كنزيدو ليها 6 ديال زلايف ديال دقيق القمح مغربل من النخالة الغليضة و كنديرو الملحة و الما دافي و حنا كنعجنو حتى كتجمع العجينة متكون لا قاصحة و لا مرخوفة كنقصو منها شوية ديال العجينة و كنديروها فعلبة ديال الزاج(و هادي هي الخميرة ديالنا كنقصوها ديما من العجينة) و باقي العجين كندهنوه بشوية ديال زيت العود و نغطيوه و نلوييه بمانطا و نخليوه يخمر 2 ديال السوايع و نكرصوه بالنخالة غليضة و نخليوه يخمر شوية و نطيبوه.

غادي نكوليكم مجموعة من النصائح باش يصدق ليكم الخبز بالخميرة البلدية ومايجيكم لا قاصح و لا حامض.

1_ معمركم ديرو الملحة العادية للعجينة حينت كضعف الخميرة البلدية انا كندير الملحة الحية كناخد حجرة منها و نغسلها و نديرها فقرعة و نزيد عليها الما طايب و نخليها ليلة كاملة حتى كذوب و ناخد من داك الما 4 ديال المعالق و نزيدها للعجينة و سبحان الله الملحة الحية كتقوي الخميرة البلدية.

2_ماعمرنا مانزيدو شي حاجة صناعية للخميرة البلدية ماديري فالعجينة لا سكر و لا الخميرة العادية و لا الفورص ديري غير دقيق القمح و الملحة الحية و الما و شوية ديال زيت البلدية.

3_ دايما النهار لي تبغي تعجني زيدي للخميرة البلدية زلافة ديال الدقيق و الما حتى كتولي بحال بغرير و خليها حتى كتخمر عاد عجني بيها بهاد الطريقة كتوكلي الخميرة ديالك و كتعطيها الجهد باش تخمر ليك العجينة.

4_ دائما خاص المقدار ديال الخميرة البلدية يكون كيساوي الثلث ديال مقدار العجينة يعني مثلا حنا صوبنا الخميرة بزلافة ديال الدقيق و زدنا ليها زلافة اخرى ديال الدقيق باش وكلنها هي ولا عدنا 2 زلايف يعني غادي نعجنوها 6 ديال زلايف ديال الدقيق.

5_ دائما الخميرة البلدية لي كنقص من العجين.كنرخفوها بالما دافي بحال بغرير و كنخبعوها فالبلاكار.

6_ ملي ككنرصو الخبز كنخليوه شوية غليض باش كيجي رطب.

7_ملي كنبغيو نطيبو الخبز كنشعلو الفران قبل على اعلى درجة الفوق و التحت و كنديرو داخل منو واحد طاسة فيها الماطايب و كنخليوه يسخن مزيان و من بعد كنحيدو ديك الطاسة و نرميو الخبز راه دغيا كيطيب و الا تبعتو هاد النصائح كاملين غادي يجيكم الخبز رطب و لديد و مافيهش الحموضة و ريحتو فاش كيطيب ياسلام يشموها كاع الجيران.

ملاحظة الخميرة بلدية مدة حياتها 4 ايام يعني خاص كلا 3 ايام و لا 4 ايام تعجنو باش ماتموتش ليكم الخميرة.

غاتقولو هاد الخميرة البلدية فيها تمارة غادي نقوليكم غادي تاكلو و توكلو لولادكم حاجة صحية و نقية انا من نهار لي وليت كنعجن بالخميرة البلدية تحسنت صحتي و صحة عائلتي. مابقاش عاندنا شي حاجة سمتيتها امساك و حت كرشك غادي تحسي بيها كتفش و كتساعد عللإ الهضم و الامتصاص اوا حيدو عليكم العكز

كسكس صنع منزلي و صحي بزاف

غادي نعطيكم طريقة ساهلة بزاف باش تفتلو كسكس بيديكم و مبقاوش تشريو كسكس نهائيا و الاهم انو صحي بزاف

غادي تاخدو الدشيشة ديال الشعير المتوسطة كتاخدو منها زلافة كبيرة و تنقيوها و تغسلوها و تستقطروها من الما و ديروها فالقصرية و غادي تاخدو شوية ديال الطحين ديال القمح و تغربلوه من ديك النخالة الغليضة و تاخدو معلقة من داك الدقيق و تزيدوه. على الدشيشة و نتوما كتفتلو (كديو و تجيبوه كسكس بصباع ايديكم) و كتبقا تزيدو فالدقيق بشوية و تفتلو حتى تحسو بديك دشيشة نشفات و مبقاتش فازكة و تحبسو الدقيق و بقاو تفتلو غادي يتشكلو عندكم كويرات ديال كسكس بلا مادوزوه فالغربال غادي دهنوه بشوية ديال الزيت البلدية و ديروه فالكسكاس بلا ماتغطيو الكسكاس. ملي يطلع معاه الفوار مزيان غادي تحيدوه و تسقويوه بالما و ماتكتروش الما باس مايتعجنش و زيدو الملح و خليوه حتى يشرب داك الما و عاودو رجعوه للكسكاس يطيب و بلا ما تغطيو الكسكاس و فالتفويرة الثالثة ديرو ليه شوية ديال السمن و القياس ديال الما و خليو ه حتى يشرب شوية و ديروه فالكسكاس و هاد المرة غطيوه. خاصو يتسقى و هوا سخون بالمرقة باش كيشربها راه كيجي لذيذ بزاف و صحي ماكينفخش و اخا تاكلي منو حتى تشبعي انا كنعطيه لولدي عندو عام و نص و تبارك الله ماكيدروش و كيعجبو و راه اقتصادي بزاف راه غير زلافة واحدة ديال الدشيشة كتقدني انا و راجلي وولدي و كيشيط. او غير لي ما بغاش يتهلى فصحتو و صحة وليداتو.

 




قد يعجبك ايضا
اترك تعليقا