حكاية طريفة للفنانة سناء عكرود مع طفليها و هكذا تصرفت معهما

نشرت الفنانة سناء عكرود على حسابها الخاص قصة طريفة وقعت لها مع أولادها و هذا كان تصرفها معهما:

الله يسمح لينا من الولدين
اليوم وهو يوم غريب و سريالي، اليوم، خلعوني شوية ولادي، بنتي لي ” يالله” عندها خمس سنين تنهدات و قالت : ” الحب زويين” بالضبط بالضبط قالت :” l amour est magnifique ”
انا بيني و بينكم تزعزعت شوية بزاف ، و خرج ليا واحد القرن ديال القرون الوسطى و دليت فمي لا إراديا حتى جا باباها بهدوء و آلية و سدو، قالي :” تكالماي و ابتاسمي ، هذا اول اختبار ديالنا كولدين ” ” ويلي اول اختبار، واش كنا كنديرو من نهار تولدو !!” … المهم…، فعلا، ابتسمت حتى بانت ليا الضرصة ديال العقل ، و هي تقوليا بنتي بلوم :” ماتضحكيش ماكنتفلاوش فالحب ”
بالضبط بالضبط وبالكلمة و الحرف قالت : ” c pas drôle mama c pas drôle l amour”

كمدتها و سكت، وهو يجي ولدي لي يالله عندو رجايا فالله ربع سنين ، قال لباباه فاش كان هذا الاخير كيلعب معاه و كيدير براسو انه كيبكي ، قاليه ولدي :” علاش كتبكي الرجال ماكيبكيوش ”
عاودنا حلينا فمنا ماسديناهش ، و نا نجمعها بوقفة و توكضت و شنقت على ولدي ، ماكاين لا تحضر لا والو، شنقت على ولدي و قلت ليه : ” شكون قاليك الرجال ماكيبكيوش ، كيبكيو كالاك ، بحال الراجل بحال المرا كلشي كيبكي ويتنخصص ملي كيعيا ، كلشي بحال بحال ”
ولدي مافهمش مسكين علاش هاد التحامل الكبير على جملة بسيطة قالها ، هي فالحقيقة راه تحامل عليا انا و على تاريخ بأسره ديال غسيل الماعن،
مشيت لبنتي و وقفتها قدامي و عينيها فعينيا و قلت ليها :” شوفي!” ، قاطعني راجلي بهدوء :” لا ماتبدايش بشوفي ..”
وخا هاكاك مارضيتش ونا نكمل : ” شوفي، غتوكضي معايا ولا غنديرو شي طاب و شي ماطابش ”
الشوفة ديال ولادي ليا داك الساع كانت كتكول بلي هضرت بالعبرية، و راجلي ربت على كتفي و كاليا :” إيه يالروايات والافلام و المسلسلات ..”
احسست بالعجز و طلبت السماحة من الولدين ديال العالم كاملين و مشيت ندير براد ديال اتاي بالنعناع و حليوات ديال كعب غزال صيفطاتهم ليا ماما من المغرب

 

 

 

 




قد يعجبك ايضا
اترك تعليقا