جبت ليكم حتى انا اسرار الكسكسو ديالي..تجميع كل ما استفدت..لون المرقة ودرجة الخثورية والبنة منقولش ليكم

السلام عليكم ورحمة الله وبركاته

من بين المسائل اللي من تحت يدي تتجي بنينة هي الكسكسو لدرجة تيلحسو مالين الدار القصعة مع ختكم جايبين القصرية من البلاد عزيزة علينا قدها قد خويا الله يطول عمرها ههههه..



فاللي تنشير انه تيفيد المبتدئات هو الرؤية الحية يعني تشوفي بعينيك شحال من مرة وهادشي كنت نعملو مع ماما واستفدت منها وطبعا حتى وليت نعقر الطياب ديال الكسكسو وماشي ضروري من اول مرة يصدق ولكن الواحد يتعلم من الاخطاء ديالو..

المهم راني نكتب النصائح واسراري فكسكسو باش يهي هشيش ورطب والاهم..بنين:

1- ملي تنبغي ننصب تنعمل الدجاج او اللحم مع البصلة مشنفة وواحد البصلة محكوكة فالحكاكة المتوسطة وتنعملهم يتشحرو مع الزيت وننقص العافية مزياااااااااااااااااااااان حتى تيتقلاو مزيان واللحم تيشرب لذة البصلة..هادي نصيحة ام الحبيبتين

2- تنقي الخضرة واللفت تنخلي شي وحدة ما تنحيد ليها دوك الجذور اللي تيكونو فالراس وماطيشة تنحكها ونزيد عليها واحد النقيطات من الحامض باش تخرج كاع الحموضية واللون يبقى والكرعة الصغيرة يعني الكورجيت والكرعة الاخرى الحمرا تنعملهم بوحدهم باش ملي نبغي نحتي على الخضرة ما نهزهم تاهوما ههههههه ..

ملي تيتشحر اللحم والبصلة تنزيد لخضرة طبعا, والنص فماطيشة محكوكة..

3- كسكسو تنختار الرقييييييييييييييييق وديال القمح باش ما يتعجن

4- فالتفويرة الثانية تنزيد الماطيشة محكوكة اللي بقات وتناخذ طريق من الكرعة حمرا تنحكها فالحكاكة المتوسطة ونزيدها تا هي ..هادي السر باش تتجي المرقة بنينة وخاترة

5- ملي تنبغي نرش الكسكسو تنرشو مزيان ونغطيه ونخليه شي 10 دقائق وننقص العافية على المرقة وملي تدوز 10 دقائق نحركو و تنرجع ونرشو عاود مزيااااااااااان ونخليه حتى يشرب ويتزاد وهادشي فكل تفويرة

صافي وملي تيتقدم ما نقولش ليكم كيفاش تيجي لون المرقة ودرجة الخثورية والبنة




قد يعجبك ايضا
اترك تعليقا