بسطيلة مغربية بفواكه البحر والشعرية الصينية

سلام الحادكات نتمنى من الله تكونو بخير ،اليوم غنبارطاجي معاكم بسطيلة الحوتجات لذيذة بزاف .
المقادير مع الطريقة :
اوى سيادنا اول حاجة نتقداو 2kg الحوت لبيض انا درت الميرنا تقدرو ديرو اي نوع كتفضلوه، 1kg كروفيت، 1 kg مخلط سيبيا وكلامار (بغيتو ديرو غير واحد )، بواطة كبيرة شومبينيون، 2 ساشيات كبار ديال فيرميسل، ساشية شومبينون نوار، حامضة مصيرة (بلا لبابة) مقطعة طريفات صغار سكينجبير طري محكوك او مقطع طريفات صغار صوص صوجا صوص الحوت صوص المحار والعطرية ديال الحوت والثوم والحامض والهريسةالمحمضة ماكتكونش حارة.
1/ شرمولة:
في كصرونة كندير كاس ديال الزيت 2 معالق كبار عامرين زبدة 4 فصيصات الثومة محكوكين معلقة كبيرة ما عمراش لهريسة شوية سودانية غبرة معلقة كبيرة ما عامراش سكينجبير معلقة صغيرة خرقوم بلدي معلقة كبيرة عطرية الحوت الحمرة معلقة كبيرة تحميرة 2 معالق كبار صوجا 2 معالق كبار صوص الحوت ومعلقة صغير صوص لمحار وقبصة ديال الملح وحطو الكصرونة فوق العافية مع التحريك حتى ذوب الزبدة عنداكم تغفلو عليها وتحرق ليكم العطرية
2/ هاد شرمولة كنرقد فيها الحوت نعصر عليه 1/2 حامضة وندخلو الفران من بعد كنفرتو وكنخلي طروفة كبار والصغار كنعزل بوحدهم، كنقي الكروفيت ونطيب القشور ديالو ونصفيهم ونرقد فيهم الفيرميسل 5 دقايق ونصفيها ونقطعها شوية.
الكلامار وسيبيا كنصلقهم في الماء غليان مع فصيص ديال الثومة والزعتر وشوية الملح. كنصفيهم والما ديالهم رقدت فيه شومبينيون نوار صفيتو وقطعتو طريفات.
لكروفيت كنصوطيه في نفس شرمولة وكنزيد شوية عصير الحامض نفس الشيء كندير لسيبيا وكلامار. ونخليوهم اتسقطرو ولاصوص اللي سقطرنا نشحرو فيها شومبينيون نوار.
نرجعو الفيرميسل كنزيد عليها شوية من نفس الشرمولة ومعلقة كبيرة الهريسة اللي ما حراش واللي حارة على حسابك ندوقوها على حساب الملح الى خاص نزيدوه ونخلطوها مزيان بيدينا حتى تشد اللون عاد نضيفو ليها حامض مصير مقطع و سكنجبير طري محكوك وشومبينيون العادي مقطع طريفات صغار وشومبينيون نوار وشوية صوص الحوت ونشحروها شوية باش كلشي ادخل في بعضياتو.
صافي وجمعو بسطيلتكم وطويوها وزينوها كيفما حبيتو
انا هنا درت طوماط سوريز كويرات الموتزاريلا كروفيت الحامض فروماج احمر محكوك و فروماج بيسطو(هاداك اللي اخضر)
بالصحة والراحة




قد يعجبك ايضا
اترك تعليقا