هدية لكل وحدة مكيطوالش ليها الشعر…أشهر وصفة طبيعية عطاتني نتيجة متوقعتهاش

بغيت نشاطر معاكم واحد الوصفة كنت قريتها فواحد المنتدى وكانوا بزاف كيشكروا فيها و قلت علاش لا نجربها حتى أنا و الله العظيم حتى عجيبة أنا كان شعري خفيف و زغبة رقيقة كنت ديمة خاصني نقطعو قصير باش يبان و منين درت الزيف قلت نخليه يطوال وخا خفيف لكن منين آستعملت هد الخلطة بانت النتيجة من ثاني مرة إوا قيدو معايا:
*مقدار من السدر ( هو وراق النبق كاين عند العطار) تقريبا 10 دراهم طحنيه فمولينكس بلا متنقيه من الشوك و غربليه تيولي بحال الحنة وخزنيه فشي قرعة.
*زيت الخرواع تقريبا 2 معالق كبار.
*زيت الزيتون نفس القياس.
*2 فصوص الثوم بالقشرة مقطعين على 2.
* بصلة متوسطة بالقشرة مقطعة على 4.
نآآآريييي البصلة و الثوم لا تيخليو الريحة……إوا لا مكاين لا ريحة لا والو تبعوا الطريقة؛
كتاخدي كاصرونة وديري فيها القدر ديال الماء ليخلط ليك على حساب طول الشعر ديري فيه الثوم و البصلة و تخليهم يغلاو حتى يولي اللون ديال الماء أصفر….فنفس الوقت خودي القدر ليكفيك من السدر المطحون 2 معالق كبار أو أكثر ديري معاهم الزيوت و صفي الثوم و البصل و خودي الماء هو لي تخلطي بيه

بحال إلى كتخلطي الحنة ماتكون لا قاصحة و لا جارية شقي بها شعرك ف الليل و فصباح غسليه..ديريها 2 مرات في الأسبوع. و الله حتى غدي تشوفي الفرق من تاني إستعمال….إوا  دعيو معايا