جبتلكم اسراري الغريبة في الطياب والحداكة والتاويل هدية مني لكل مبتدئة في الطبخ
نقدم لكم عزيزاتي متتبعات مجلة يا لالة موضوع شامل للاسرار الغريبة في الطبخ والحداكة والتاويل
موضوع للاخت لون الحياة
فاش نبغي نطيب المرقة أو أي حاجة تبغي البصل حتى الحريرة تا نحك بصيلة صغيرة في الحكاكة الغليضة نيشان في صفاية ونعصرها من الماء نهائي عاد نطيب بيه، هذا تا يخلي المرق خاتر وما يجيش مارج، وتا يحيد الزفورية ديال البصل
تنغلب المعدنوس على القزبور و تندير تومة بزايد هي لي تتحيد الزفورة فالطياب و كذلك دييييما البصلة محكوكة متنحملهاش طروف كبار و ايضا تنغلب زيت العود على الرومية و ملي نبغي نمرق تنمرق بماء يكون شوية سخون ماشي بزاااف و ملي يطيب طيابي يا لالة نخليه يتشحر مزيان ماشي يكون تيعوم فلبيسين و هدا مكان
الماء ديال ترقاد لحامض تنزيد في تشرميلة ديال الحوت وفي زعلوك وفي المرق ودجاج تيجيب لأكل بنين
كيفما كان الطاجين باللحم او الدجاج او الخضر تنفرش الجزر هوا الاول عاد نحط اللحوم (باش ميتحرقش اللحم) و تنستف الخضر و عاد نتكب عليهم شوية الزيت رومية ( تقريبا 2 معالق كبار) من بعد تنكب عليهم زلافة مخلطة فيها العطرية و نصف كاس صغير ماء و تنطيب الطاجين على عافية مهيلة و مرة مرة نراقب الماء باش ميتحرقش فالاخير تنزيد شوية زيت الزيتون و رشيشة معدنوس و بالصحة و الهنا
الكيك الا بغيتو يبقى لكم مدة طويلة و يبقى هشيش زيدي فيه قطرات من الخل
الربيع الا كنتي اديريه في الفريكو نقيه و غسليه و ديريه في شبيكة تاينشف مزيان عاد قطعيه كتبقى ريحتو و لونو فحال عاد مقطع
باش تجيك مريقة د اللحم بالبرقوق زوينة و لذيذة تا اخر لحظة و زيدي شوية سنيدة
اللي مافيها مايقشر التومة تحكها مباشرة في الحكاكة الرقيقة القشرة كتبقى الفوق و كتحصلي على تومة محكوكة بلا ماتصدعي راسك بتقشيرها
من كنبغي نصايب الكيك بالفواكه الجافة وشكلاط مقطع كندير الفواكه الجافة فشي زلافة ونزيد عليها جوج معالق دقيق كنمرمدهم كنغربلهم من الدقيق
كنزيدهم فوق الكيك وهاكدا كيبقاو فالوسط الكيك مكيهبطوش تحت
فاش تنعجن شيار تنزيد عليه معلقة سنيدة وتندلق مزيان ولعجينة تنرخفهة بزاف وفي لاخر تنذنهة بزيت ونخليها تخمار تيجي شيار منفوخ ورطب وبنين
فاش تندير كرواصة تنذنهة بصفار البيض وشوية قرفة مدقوقة تتحيد زفورية ديال لبيض وتجي لمداق بنين وريحة رائعة ملي تبدا طيب وريحة عاطية
انا السر ديالي فالحريرة ملي كطيب ونبغي نطفي عليها كنزيد شوية ديال القزبر والمعدنوس ولكرافص اللي كنت ناقصاهم من قبل ونحركها شوية ونطفي.كتجي رااائعة وكلشي كتعجبهم .حريرتي حرييرة
فاش كنعجن الخبز كنخلط كلشي بدون خميرة كنغطيه ونخليه يرتاح في قصرية حتى نكمل جميع الدار عاد نذوب لخميرة مع شوية سكر نفرغ لما في قصرية ونعطيها 2 ضربات هههه بلى تمارة بلى دليك بلى صداع راس ونعاود نخليها 10 دقائق ونكرص كيجي كيف الشهد
باش صدر دجاج المحمر ديال مناسبات يجيك رطب وشارب لعطرية ماشي بيض ومزلق كنهز جلدة ونفلحو 2 فلحات بالسكين وندخل فيهم العطرية وحامض ونرجع جلدة باش يبقى مشدود ونخليه يرقاد ممكن طيبيه في ساعتو وشوفو على بنة غادي يجي شارب فحال مرقده سيمانة وشحال غادين يشكروه
سر اخر لدجاج المناسبات بلي تغسلي دجاج وتخليه يتسقطر قبل ما ترقديه بالعطرية وربيع غادة تطحني حبيبات كمون ضروري يكون عاد طحنتية عصري عليهم شوية حامض ومليحة وحكيه على دجاج مزيآآآان من داخل خليه شوية عاد ديري لعطرية غادين تشوفو على تزنزينة ههههه غادة تبقى فمك بلي تاكليه كلشي غادي يتسط عليه اييييييه يتسط بالبنة ديالو هههههه
باش تبقا ريحة الترموس زوينا تاع القهوة كانديرو فيها 2 عودات تاع القرفة او تاع الحليب كاندير فيها قطعة السكر
باش دجاج كاتحيد منه الزفورية كانغسلوع بشوية تاع الطحين او سكنجبير او الماء اونخليو دجاج يرقاد فهد الخليط
من كانبغي نحمر دجاج كاندهنو بشوية تاع الهريسة مممممممممممممممم عل بنة كاتجي فيه
ملي كيطيب الطاجين ونقرب نطفي عليه بوقت قليل.كنحك فوق منه الضامة ديال الثومة ونزيد فوقه معلقة ديال الزيت البلدية ونطفيء عليه هههه
ملي كنصب الطاجين ديال الدجاج كنرش عليه الكامون كيجي بنين
هاد طاجين ديال زعلوك مكينش بحالو الد من مكان
إو تنشد دنجال نقطعوه دوائر ولفلفلة خضراء دوائر ومطيشة بزايد دوائر وفي زلافة نحوكو توما وربيع ولكامون لملح ابزار تحميرا لهريسة زيت بلدية ولما ديال ترقاد لحامض نخلطو كلشي وندير معلقة في قلب طاجين ونستفو دنجال تم الفلفل ومطيشة تم زيتون ونسقيو بلخليط نعاود دنجال فلفلة ومطيشة وزيتون وباقي شرمولة وتنحطوه على نار مهيلة أو لفاخر حسن حتى يتعصر وينشف تيجي زوين